हिमालय बाल्टिमोर युनाइटेड एफसीको आयोजनामा सम्पन्न दशै कप भेट्रान फुटबल प्रतियोगिताको उपाधि नोभ भेट्रानले जितेको छ । फाइनलमा बाल्टिमोर एथ्लेटिक क्लबलाई पाँच दुई गोल अन्तरले पराजित गर्दै नोभा पहिलो संस्करणको च्याम्पियन बनेको हो ।
बाल्टिमोरको कटन्सभिलमा भएको फाइनलमा नोभाले खेलको सुरुवात देखि नै दबाब बनाएको थियो । जसमा नोभाले शिशिर अधिकारीको गोल मार्फत खेलमा अग्रता बनाएको थियो । त्यसपछि ज्याक्सन सुनुवारले नोभाका लागि दोस्रो गोल गरे । पहिलो हाफमा दबदबा बनाएको नोभाका लागि सिनतेनले तेस्रो गोल गरेका थिए । उसका लागि बाँकी दुई गोल दिपक र मिलनले गरेका थिए ।
बीएसीका लागि एलेन र यसुले एक एक गोल गरेका थिए । प्रतियोगिताको सर्वाधिक गोलकर्ता नोभाका ज्याक्सन बने । यस्तै प्रतियोगिताको सर्वोत्कृष्ठ खेलाडी बीएसीका एलेन बने । प्रतियोगिताको फेयरप्लेको उपाधि सुदुरपश्चिमले पायो ।
८ टिमको सहभागिता रहेको प्रतियोगिता दुई दिनसम्म चलेको थियो । उपाधिसँगै नोभाले २५ सय डलर हात पार्यो भने उपविजेता बनेको बीएसीले १५ सय डलर पायो ।
विजेता टिमका खेलाडीलाई डेलिगेट्स ह्यारी भण्डारी, बानाका अध्यक्ष सुबोध पन्त, एनआरएनए बाल्टिमोर च्याप्टरका अध्यक्ष कुल गुरुङले पुरस्कार वितरण गरेका थिए ।
यो प्रतियोगिताका लागि पहिलो पुरस्कारको प्रायोजन साथी बाल्टिमोरका संस्थापक अध्यक्ष रमेश भट्टले गरेका थिए । कार्यक्रममा डेलिगेट्स ह्यारी भण्डारीले हिमालय बाल्टिमोर युनाइटेड एफसीलाई साइटेसनपनि प्रदान गरेका थिए ।
