नेपालीहरुको दोस्रो ठूलो चाँड तिहार आएसँगै नेपालमा जति रौनक छाएको छ, त्यति नै नेपालबाहिर बस्ने नेपालीहरुले पनि आफ्नो तरिकाले मनाइरहेका छन । आफ्नो जन्मथलोको सम्झनालाई केहि हदसम्म बिर्साउन भएपनि प्रदेशमा रहेका नेपालीले तिहारलाई सकेसम्म उल्लासका साथ मनाइरहेका छन ।
तिहारमा भाईटिकासँगै अर्को रमाईलो देउसी भैलो खेल्नु रहेको छ । जसलाई अमेरिकामा पनि मज्जाले मनाइएको छ । अमेरिकाका विभिन्न शहरमा रहेका नेपालीले सकेसम्म मिलेर देउसी भैलो खेलेका छन । नेपालका अनुसार समय नमिलेपनि आफ्नो अनुकुल पारेर उनीहरुले देउसी खेल्ने परम्परलाई अमेरिकामा पनि निरन्तरता दिएका छन ।
अमेरिकाको मेरिल्याण्ड, पेन्सलभेनिया, भर्जिनिया लगायतका राज्यमा रहेका नेपालीले देउसी भैलोलाई विशेष रुपमा मनाएका तस्विर र भिडियोहरु सामाजिक सञ्जालमा निकै देखिएका छन । बाल्टिमोरमा रहेका नेपालीहरुले आफ्नो आफ्नो तरिकाले देउसी खेलेर मनाएका छन । जसमा विभिन्न संस्था र समाजहरुले यसको आयोजना गरेका थिए भने यहि अवसरमा नेपाली चर्चित गायक प्रकाश सपुतले पनि तिहारकै अवसरमा सांगितिक प्रस्तुती दिएका थिए ।
मेरिल्याण्डमा बाल्टिमोर एसोसियसन अफ नेप्लिज इन अमेरिकाले पनि देउसीको आयोजना दुई दिनसम्म गरेको थियो । यस्तै एनआरएनए बाल्टिमोर च्याप्टरले पनि यसको आयोजना गरेको थियो भने पर्बत समाज, सुदुरपश्चिम समाज, इनासले पनि देउसीको आयोजना गरेको थियो । यसका साथै एक समुदायमा बस्दै आएका नेपाली मिलेर पनि कार्यक्रम गरेका थिए ।
नेपालमा जस्तै देउसी भैलो खेल्नका लागि धेरैको सहभागिता समेत रहेको थियो । जसमा बालबालिका देखि पाकाले पनि रमाईलो गरेका थिए । दशै जस्तै तिहारलाई पनि उपयुक्त साईत पारेर अमेरिकापनि मनाउने गरेका छन । यस्तै नेपालमा बुधबार भाईटिका रहेकोमा अमेरिकामा बुधबार उपयुक्त साईत पारेर मनाईनेछ ।
