अमेरिकामा निर्वाचन नजिकिदैं छ । निर्वाचन आउदै गर्दा यहांका नेपाली भोटरहरुले पनि महत्व पाउन थालेका छन् । एशियन मूलकी बर्तमान उपराष्ट्रपति कमला ह्यारिश राष्ट्रपतिमा उठेपछि नेपालीको मत धेरै कमलालाई नै जाने विश्वास पनि गरिएको छ ।

मेरिल्याण्डमा रिपव्लिकन पार्टीमा पनि नेपाली राम्रै संख्यामा आबद्ध भएको पाईन्छ । तर, अहिलेसम्म कुनै पोष्टमा देखिदैनन र खुलेर कुनै सार्बजनिक कार्यक्रम गरेको जानकारीमा छैन ।

कमलाले टिकट पाएको डेमोक्रेटिक पार्टिमा धेरै नेपालीहरु खुलेरै आबद्ध पनि छन् । डेमोक्रेटिक पार्टीबाट नेपाली मूलका ह्यारी भण्डारी मेरिल्याण्डको हाउसमा डेलिगेट नै छन्।  स्टेट डेलिगेट भण्डारी पनि अहिले आफ्ना पार्टीका उमेद्वारहरुलाई विजयी बनाउन सक्रियताका साथ लागेका छन् । 

अघिल्लो निर्वाचनमा मेरिल्याण्ड राज्यबाट डेमोक्रेटिक पार्टीमा केन्द्रिय सदस्य निर्वाचित भएका सतीश चापागाई पनि पार्टीका विभिन्न कार्यक्रममा व्यस्त देखिन्छन् । “यो दुई महिना अति नै व्यस्त भएं ।” चापागाई भन्छन्, “पार्टीका चुनावी अभियान केन्द्रित कार्यक्रमहरु मै बढि सक्रिय भएको छु । पार्टीमा नेपाली मतदाताहरुको महत्व स्थापित गर्न सकिएकोमा खुशी लाग्छ ।”

मेरिल्याण्डको डेमोक्रेटिक पार्टीमा नेपालीहरुलाई भिजिबल बनाउने हस्तिहरुमा डाक्टर श्याम कार्की र तरुण पौडेलको नाम अग्रपंक्तिमा आउछ । डाक्टर कार्की पनि यतिबेला अति नै सक्रिय छन् । हरेक कार्यक्रमहरुमा उनको उपस्थिती र सहभागीता देख्न सकिन्छ । डाक्टर कार्की भन्छन, “हामीले भोट दिने मात्र हैन हाम्रो महत्व पनि देखाउन सक्नुपर्छ ।” त्यहि भएर कार्की उमेद्वारहरुसंग नजिकको सम्बन्ध राख्छन र नेपालीहरुको मतको महत्व बताउंदै आउंछन ।

त्यस्तै समाजसेवी तरुण पौडेल पनि यो निर्वाचनमा उमेद्वार र भोटरबीचको सम्बन्ध गराईरहन र नेपाली समुदायलाई डेमोक्रेटिक पार्टीसंग सम्बन्ध स्थापित गर्न लामो समयदेखि क्रियाशील छन् । नेपालीहरु भोट हाल्ने र उमेद्वार हुने प्रक्रियामा सामेल हुनुपर्छ भन्ने पौडेलको तर्क छ । 

अमेरिकाभरी नै नेपालीहरु डेमोक्रेटिक पार्टीमा बढि संख्यामा सक्रिय छन् । मेरिल्याण्डमा पनि यो संख्या बढि छ र बढ्ने क्रममा छ । 

एनआरएनए अमेरिकाका पूर्ब अध्यक्षहरु डोलनाथ घिमिरे र राजु पराजुली पनि पार्टीका  विभिन्न गतिबिधीमा सहभागी हुदै आएका छन् । दुबैजना सक्रिय पनि छन् । “हामीले हाम्रो आउने पुस्ताको लागि बाटो खनेर छोड्नु पर्छ ।” राजु पराजुलीले भने ।

नेपालीहरुको सहभागीतालाई यहांका नेताहरुलो पनि राम्रो र उत्साहजनक रुपमा हेरेका छन् । पार्टीका डेलिगेट कार्ल ज्याक्सन नेपाली माझ अति नै भिजेका डेमोक्र्याट नेता हुन् । उनी भन्छन्, “म विगत केही वर्षदेखि नेपाली समुदायसँग साझेदार र मित्र हुन पाउँदा धेरै खुसी छु र मलाई थाहा छ कि डिष्ट्रिक ८ का मेरो पार्टीका सबै सहकर्मीहरूले यस्तै महसुस गर्छन्।”

डेमोक्रेटिक पार्टीमा सक्रिय हुनेहरुमा ईन्द्र बहादुर थापा, रमेश भट्ट, रविन शर्मा, जितेन गुरुगं, प्रविन खड्का, केश बहादुर गुरुगं यो निर्वाचनमा अग्रपंक्तिमा देखिन्छन् ।