पुर्व प्रधानमन्त्री बाबुराम भट्टराईले बर्तमान सरकार राम्रो काम नगरे पनि सरकार परिबर्तन बारेका हल्लाहरुले नेपालको राजनीतिलाई शुभ संकेत नभएको बताएका छन् । भट्टराईले यो सरकारले आशातित काम गर्न नसकेको र दुईतिहाईको महत्व नबुझेको पनि बताए । कांग्रेसले पनि प्रतिपक्षको भूमिका निर्वाह नगरेको बताए ।   एक महिना लामो अमेरिका भ्रमण सकेर नेपाल फर्कनु अगाडी अमेरिकाको बाल्टिमोरमा नेप्लिज डायस्पोराका प्रधान सम्पादक सतिश चापागाईंलाई अन्तरबार्ता दिदै भट्टराईले उक्त कुरा बताएका हुन् ।   पुर्व प्रधानमन्त्री तथा नयाँ शक्ति पार्टीका संयोजक डा. बाबुराम भट्टराई एक महिने अमेरिका भ्रमण सकेर मंगलबार श्रीमती हिसिला यमीसंगै नेपाल फर्केका छन् ।   अन्तरबार्तामा उनले अमेरिकाको आफ्नो भ्रमणको उद्देश्य अनुरुप कै उपलब्धि प्राप्त भएको बताएका छन् ।   भट्टराईलाई टेक्सास राज्यको एउटा कार्यक्रममा कालो झण्डा देखाईएको थियो । उनले अमेरिकामा सामना गरेको कालो झण्डाको बारेमा पनि तिक्तता ब्यक्त गरे र उक्त कार्यलाई रोगी मानसिकताको संज्ञा दिए ।   पुर्बप्रधानमन्त्री भट्टराईले संबिधान बनिसकेपछि नेपालका पार्टीहरुको एजेन्डा पनि सकिएको र नयाँ विचार सहितको पार्टीको आवश्यकता खडकिएकोले नयाँ शक्तिको स्थापना गरेको बताए । साथै उनले अर्को चुनावसम्ममा आफ्नो पार्टीले राम्रो उपस्थिति देखाउने विश्वास ब्यक्त गरे ।