एनआरएनए आईसीसीको सचिव पदमा कृष्णजीवि पन्थले उमेद्वारी दिने सार्बजनिक घोषणा गरेका छन् ।
पन्थले आफ्नै फेसबुक मार्फत केहि दिन अगाडी उक्त घोषणा गरेका हुन् ।पन्थ एनआरएनए अमेरिकाका निवर्तमान बरिष्ठ उपाध्यक्ष हुन् । उनले बोर्ड मेम्बर र उपाध्यक्ष हुदै बरिष्ठ उपाध्यक्षको जिम्मेवारी पुरा गरेका हुन् ।
"मैले अमेरिकामा पटक पटक जिम्मेवारी पाएं र सो जिम्मेवारीलाई सक्रियताका साथ निभाएं ।" कृष्णजीवि पन्थले नेप्लिज डायस्पोराका प्रधान सम्पादक सतीश चापागाईसंगको टेलिफोन कुराकानीमा भने, "अब म आईसीसीको लेबलमा काम गर्न चाहन्छु ।"
पन्थले भने "एनसीसीहरुले धेरै काम गर्न सक्छन तर आईसीसीमा गएर धेरै कुराहरु रोकिन्छ । अब म त्यहां गएर एनसीसीहरुका पक्षमा आवाज उठाउछु । साधारण सदस्यहरुका पक्षमा आवाज उठाउंछु ।"
"हरेक एनसीसीका सबै सदस्यहरुले आईसीसीको निर्वाचनमा पनि भोट हाल्न पाउनु पर्छ । प्रतिनिधि कोटाको सिष्टम हट्नुपर्छ ।" पन्थले भने । "म त्यसकारण उमेद्वारी दिदैछु ।"
एनआरएनए एनसीसी अमेरिकाका सबै निर्वाचनहरुमा लोकप्रिय र भारी मतका साथ विजयी हुने गरेका पन्थले यो पटकको निर्वाचनमा अध्यक्ष पदको लागि स्वभाविक दाबेदार थिए । तर पन्थले संस्थाको शुद्धिकरणका लागि आफुले योगदान गर्ने भन्दै अध्यक्षको पदमा नउठ्ने निर्णय गरेका थिए ।
साथै पन्थले संस्थामा लामो समय योगदान गरेका साथीहरुलाई समेट्दै डाक्टर अर्जुन बन्जाडेको नेतृत्वमा एउटा टिम बनाए र उनीहरुलाई जिताउने संकल्प गरे । यो कामलाई तार्किक निष्कर्षमा पुर्याएको भन्दै नजिकका साथीभाईहरुले पन्थलाई क्रेडिट दिंदै आएका छन् ।
एनआरएनए अमेरिकाको निवर्तमान कार्यसमितिका अधिकांश पदाधिकारीहरु फेस भेरिफिकेशन सहितको निर्वाचनका विपक्षमा रहेका बेला पन्थकै अडानका कारण फेस भेरिफिकेशन सहितको निर्वाचन सम्भब भएको पनि बताईन्छ ।
एनआरएनए अमेरिकाको भर्जिनियामा खरीद गरिएको भवनको श्रेय पनि पन्थलाई नै जान्छ । झण्डै तीन लाख अमेरिकी डलर नगद जम्मा गरेर खरीद गरिएको यो योजनाको संयोजक कृष्णजीवि पन्त नै थिए ।
पन्थकै नेतृत्वमा नेपालको सल्यान जिल्लाको विकट गांउमा झण्डै एक करोड खर्चमा प्रसुती गृह निर्माण सम्पन्न भई संचालनमा आएको छ । आईसीसीको 'एक एनसीसीसी एक सामाजिक परियोजना' शिर्षकमा यो काम सम्पन्न भएको हो ।
आफू उमेद्वार हुने कुरा सार्बजनिक भएपछि संसारभरीबाट शुभकामना प्राप्त भएकोले आफूमा हौसला बढेको पन्थले नेप्लिज डायस्पोरासंगको कुराकानीमा बताए ।
.png)
