दुई पक्षीय विवादका कारण असहज अवस्था सिर्जना भएपछि गैरआवासीय नेपाली संघ (एनआरएनए) को कार्यालयमा कर्मचारी जान छाडेका छन् । 

विगत तीन दिनयता कर्मचारीहरूले घरबाटै कार्यालयको काम थालेका हुन् ।

केही दिन पहिला संस्थापन पक्षका अध्यक्ष बद्री केसीलाई प्रमुख कार्यकारी निर्देशक राजेन्द्र कुमार रावतले काम गर्न असहज भएको जानकारी गराएका थिए । सो जानकारी पछि केसीले नै तत्कालका लागि घरबाटै कार्यसम्पादन गर्न निर्देशन दिएको बताइएको छ ।

अध्यक्ष केसीले असन्तुष्ट पक्षले कार्यालयमा होहल्ला गर्नेदेखि अनावश्यक दबाब दिएपछि कर्मचारी मानसिक तनावमा देखिएको देखिए । कर्मचारीमा परेको असहज अवस्थालाई मध्यनजर गर्दै हाललाई घरबाटै कार्यसम्पादन गर्न भनिएको उनको भनाइ छ । 

असन्तुष्ट पक्षले भने कार्यालय खुला गर्न आग्रह गर्दै कार्यकारी निर्देशक राउतलाई बुधवार पत्र पठाएको छ । आरके शर्मा पक्षका महासचिव बुद्धि सुवेदीले कार्यालय नियमित सञ्चालन गर्न आग्रह गर्दै पत्र पठाइएको बताए । राउतलाई पठाइएको पत्रमा कार्यालय के कति कारणले बन्द गरिएको हो भन्नेबारे जानकारी सहित खोल्न भनिएको छ । 

पत्रमा भनिएको छ, ‘ गैरआवासीय नेपाली संघ (एनआरएनए) को विश्व सम्मेलनमा विदेशबाट गैरआवासीय नेपालीहरु नेपाल आएको अवस्था छ । यो अवस्थामा आफ्नो केन्द्रीय कार्यालयमा एनआरएनहरु कार्यालय बन्द भएको कारण जान नपाएको स्थिति छ । केन्द्रीय कार्यालय बालुवाटार पछिल्लो दुई दिनदेखि बन्द रहेको कारण नेपाल आएका एनआरएनले आफ्नो नियमित काम गर्न नसकेको अवस्था देखिएको छ । सार्वजनिक बिदा बाहेक कार्यालय खोल्नुपर्ने नियम रहे पनि के कति कारणले कार्यालय बन्द गरिएको हो ? त्यसको जानकारी सहित कार्यालय खोल्न अनुरोध गर्दछु ।’

एनआरएनएको ११ औँ विश्व सम्मेलनबाट बद्री केसी विजयी भएपनि अध्यक्षका दुई प्रत्यासीहरु आरके शर्मा र महेश श्रेष्ठले नतिजा अस्वीकार गरेका छन् । असन्तुष्ट पक्षले शर्मालाई अध्यक्ष घोषणा गरेर आफू नै आधिकारिक दाबी गरेपछि दुई पक्षीय तनाव हुँदै आएको छ । सोही क्रममा मंगलबार कार्यालयमा युवा संघले केसीलाई बधाई दिन आयोजित कार्यक्रममा हातपात समेत भएको थियो । सो घटनापछि दुवै पक्षले एक अर्कालाई कारबाहीको माग गर्दै प्रहरीमा निवेदन दिएको बताइएको छ ।