सतिश चापागाईं / लक्ष्मण पौडेल मेरिल्याण्ड अमेरिका अमेरिकामा रहेकी गायिका अञ्जना गुरुङ बिरामी भएकी छिन । उनको मेजर अपरेशन भएको र अहिले घरमा बेड रेष्ट गरिरहेकी उनका श्रीमान कन्हैया सिंहले नेप्लिज डायस्पोरालाई जानकारी दिए ।   दशैंको दिन राति खाना खाएर सुतेकी गुरुङलाई राति २ बजेदेखि पेट दुख्न शुरु गरेको थियो । केहि घण्टा मै हस्पिटल लगिएको थियो । उनको पित्त थैलीमा धेरै नै इन्फेक्सन भएकोले उनको मेजर अपरेशन गरिएको पनि कन्हैया सिंहले नेप्लिज डायस्पोरालाई बताए ।   गायिका गुरुङलाई अपरेशन पछि मेरिल्याण्डको बाल्टिमोरमा रहेको घर ल्याइएको छ । अहिले दुखाई कम भएको बताएकी छिन । उनी बेड रेष्टमा छिन । डाक्टरले एक हप्ता बेड रेष्ट गर्न भनेको पनि कन्हैया सिंहले बताए ।   चर्चित गायिका गुरुङ सात बर्षदेखि श्रीमान र छोरी संगै अमेरिकामा छिन । उनका श्रीमान कन्हैया सिंह १० बर्षदेखि यहाँ छन् ।   बिरामी भएको थाहा पाएपछि गायिका गुरुङलाई भेट्न गायक भगवान भण्डारी, लक्ष्मण पौडेल लगायतका कलाकारहरु अस्पताल पुगेका थिए ।