मुक्तक -१ मेलमिलाप गरेर सबै भाग मिलाए ठूला-साना हेरेर सबैलाई खिलाए बोल्नभन्दा धेरै तमासा हेर्छन् यहाँ किन सबैले अा-अाफ्नो मुख सिलाए ? - शारदा घिमिरे भैल मुक्तक -२ गाउँबस्ती, देश र जनता सबलाई पिर्यौ अति भयो छाला काट्दा नदुख्ला बरु मनै चिर्यौ अति भयो झुप्राहरुको भर्याङ बनाइ आफू माथी उक्लिएर त्यही झुप्रामा आगो झोँसी महल छिर्यौ अति भयो । - केशब बस्नेत मुक्तक -३ जनताले दिएको मान-सम्मान, भुल्नुभयो आज सिंहदरबार पुग्दा आफ्नै पहिचान, भुल्नुभयो आज हिजो देश बदल्ने सपना देखेर हिँडेका सहिदहरुको त्यतिधेरै त्याग तपस्या र बलिदान, भुल्नुभयो आज । -कविता घर्ती मगर मुक्तक -४ सैतानी चलखेलहरु, सधैका लागि ढल्नुपर्छ आफ्नै मन मस्तिष्कमा, चेतनाको दियो बल्नुपर्छ माटो हेरेर पो काम गर्नु, देशैको किन बदनाम गर्नु ? साह्रै भयो नेपाली अब, स्वविवेकले चल्नुपर्छ । ✍ गोम बिक्रम कल्लाबारी, पाल्पा । मुक्तक -५ चाकरी चम्चागीरी जान्ने जुनसुकै खालमा पनि अटाउँछ बोल्नेकै पीठो बिक्छ यहाँ चिप्लो घस्नेले ईनाम पाउँछ मिडिया हमेशा दाइने रहुन्, चाप्लुसीले ठाउँ पाईनै रहुन् पहिलो हुने वर्गीकृतमा हजुर, तेश्रोलाई मुखपृष्ठमा ठाउँ छ ! - सुनिल अधिकारी स्वयम्भू, काठमाण्डौ । (✍️ ५ स्रष्टाका ५ मुक्तकहरूहरू साहित्यकार गोम बिक्रमले संकलन गर्नु भएको हो । नेप्लिज डायस्पोरा पत्रकार सतिश चापागाईंको सम्पादकत्वमा अमेरिकाबाट संचालन हुने अनलाइन हो । तपाई पनि नेप्लिज डायस्पोरामा साहित्यिक रचना पठाउन चाहनुहुन्छ भने गोम बिक्रमको फेसबुक (https://www.facebook.com/gom.bicram)  मा सम्पर्क गर्नुहोला । नेप्लिज डायस्पोराको फेसबुक पेज https://www.facebook.com/nepalesediaspora लाइक गर्न र युट्युब च्यानल https://www.youtube.com/nepalesediaspora लाई सब्स्क्राइब पनि गर्नु होला। -सम्पादक|)