५, भाद्र २०७६
सेतो रंग
मन पराउँदैनन् चराहरू,
त्यसैले नभन्नु,
यो शान्तिको प्रतीक हो ।
हुल बाँधिएर,
खोल्दैनन् चराहरू
युद्धको मोर्चा,
सन्धि बनाएर
आबद्ध हुँदैनन् संगठनमा, र
बोक्दैनन् परिचयपत्र,
सीमामा बलात्कृत बन्न ।।
चराको कलरवमा,
ओजोन तह र आतङ्कवादको
कुनै बहस हुँदैन,
न त सम्पन्नताको बयान ...
मानिस झैँ चराहरू,
भूगोल छेक्दैनन् सीमा बनाएर,
चन्द्रमामा चकोर खोज्दैनन्,
सूर्यको गति नाप्दैनन्,
न त सम्मानको खातिर
कुनै पहिचान नै बदल्छ्न् ...
बिना पर्वाह आऊ प्रिय,
यिनै चराको गीत गाऊँ ..... ..
- झापा, हाल काठमाडौ, अनामनगर ।
( कृष्ण प्रसाईको यो कविता साहित्यकार गोम बिक्रमले संकलन गर्नु भएको हो । नेप्लिज डायस्पोरा पत्रकार सतिश चापागाईंको सम्पादकत्वमा अमेरिकाबाट संचालन हुने अनलाइन हो । तपाई पनि नेप्लिज डायस्पोरामा साहित्यिक रचना पठाउन चाहनुहुन्छ भने गोम बिक्रमको फेसबुक (https://www.facebook.com/gom.bicram) मा सम्पर्क गर्नुहोला । नेप्लिज डायस्पोराको फेसबुक पेज https://www.facebook.com/nepalesediaspora लाइक गर्न र युट्युब च्यानल https://www.youtube.com/nepalesediaspora लाई सब्स्क्राइब पनि गर्नु होला। -सम्पादक ।)
प्रकाशित मिति :भाद्र ५, २०७६ बिहिवार -
२०:००:३५ बजे
