मुक्तक-१ वसन्त होस कि शरद हजुर रात भने एउटै हुन्छ मार्सी होस कि सो‍ना हजुर भात भने एउटै हुन्छ जति गर धनैले पुर मान्छे त ठूलो सानो हुन्न हेर छुत होस कि अछूत हजुर जात भने एउटै हुन्छ । - प्रथा ओमकार काठमाण्डौ ............................................. मुक्तक -२ कति गर्छौ पण्डित्याईं, बन्छौ दूत कैलेसम्म ! समाजको अलग पात्र, अदभूत कैलेसम्म ! आजसम्म समाजमा अनुत्तरित एउटै प्रश्न ? जातीय विभेद मुक्त यो छुवाछूत कैलेसम्म ! - उत्तम भेटुवाल लिखु -६ नुवाकोट । ............................................. मुक्तक -३ जसको सीप पसिनाले, पत्थर मूर्त बनिदिन्छन् सर्वोत्कृष्ठ आकर्षणको, सम्पदामा गनिदिन्छन् सञ्चारभरी चर्चा चल्छ, सम्मान पूजा पर्चा चल्छ ओझल पर्छ मूर्तिकार, अझै अछूत भनिदिन्छन् । ✍ गोम बिक्रम कल्लाबारी, पाल्पा । ........................................................ मुक्तक -४  मानवता भन्दा न धर्म ठूलो हुन्छ, न जात ठूलो हुन्छ बरु आपसी सद्भावमा बस्न जान्ने जमात ठूलो हुन्छ आस्था हुनै पर्छ सदैव राख्नुहोला,तर यो बुझेर मात्र भजन गाउने ओठ भन्दा, सेवा गर्ने हात ठूलो हुन्छ । - कृष्ण पाण्डेय बुटवल, नेपाल हाल : दुबई । (बिभिन्न मुक्तककारका यी मुक्तकहरु साहित्यकार गोम बिक्रमले संकलन गर्नु भएको हो । नेप्लिज डायस्पोरा पत्रकार सतिश चापागाईंको सम्पादकत्वमा अमेरिकाबाट संचालन हुने अनलाइन हो । तपाई पनि नेप्लिज डायस्पोरामा साहित्यिक रचना पठाउन चाहनुहुन्छ भने गोम बिक्रमको फेसबुक (https://www.facebook.com/gom.bicram)  मा सम्पर्क गर्नुहोला । नेप्लिज डायस्पोराको फेसबुक पेज https://www.facebook.com/nepalesediaspora लाइक गर्न र युट्युब च्यानल https://www.youtube.com/nepalesediaspora लाई सब्स्क्राइब पनि गर्नु होला। -सम्पादक ।)