मुक्तक -१ चुनौतीको सेरोफेरो अरू पनि छ जिन्दगीमा अप्ठेरो अरू पनि छ छुट्नेहरु छुटीगए के नै भयो र ? बाँच्नु पर्ने जीवन मेरो अरू पनि छ । मुक्तक - २ न जीतको बनायौ, न हारको बनायौ जे बनायौ, जिन्दगी बेकारको बनायौ भीरबाट लडाएर डोरी दियौ प्रिय मान्छे बाँचौँ या त मरिजाऊँ दोधारको बनायौ । मुक्तक - ३ ऊ प्रायः यसरी नै लगातार पठाइरहन्छ कुन्नि के -के सोचेर बेकार पठाइरहन्छ जसले मेरो हातबाट औंला काटेर लियो उसैले मलाई कलम उपहार पठाइरहन्छ । मुक्तक - ४ हरकोहिको चित्त लुट्नसक्ने आवारा हो मानौँ देख्न सकिने छुन नसकिने तारा हो जब तिम्रो रुपको आतंक देखेँ सहरभरि लाग्यो त्यो रुप पनि खुंखार ज्यानमारा हो मुक्तक - ५ गर्छन् सधैँ आनाकानी जात पहिले सोध्छन् देखाउँदै जङ्गली बानी जात पहिले सोध्छन् सहरतिर पनि रैछ यो छुवाछुतको महामारी घरबेटीले नामभन्दा नि जात पहिले सोध्छन् । कोहलपुर, बाँके । ( चिन्तन नेपालका यी मुक्तकहरु साहित्यकार गोम बिक्रमले संकलन गर्नु भएको हो । नेप्लिज डायस्पोरा पत्रकार सतिश चापागाईंको सम्पादकत्वमा अमेरिकाबाट संचालन हुने अनलाइन हो । तपाई पनि नेप्लिज डायस्पोरामा साहित्यिक रचना पठाउन चाहनुहुन्छ भने गोम बिक्रमको फेसबुक (https://www.facebook.com/gom.bicram) मा सम्पर्क गर्नुहोला । नेप्लिज डायस्पोराको फेसबुक पेज https://www.facebook.com/nepalesediaspora लाइक गर्न र युट्युब च्यानल https://www.youtube.com/nepalesediaspora लाई सब्स्क्राइब पनि गर्नु होला। -सम्पादक ।)