मुक्तक -१ आफ्नो दु:ख पो दु:ख जस्तो, आफ्नै व्यथा ठूलो लाग्छ आफ्नो इज्जत चन्दन ठान्छ, अरूको उचाई धूलो लाग्छ आँखामा स्वार्थको चश्मा हुँदा, मन स्वार्थको बसमा हुँदा आफ्नो पीडा महासागर देख्छ, अरुको पीडा कुलो लाग्छ । मुक्तक - २ पहिले आँखै-आँखैमा दुबैले मुटु साटे होलान् अब त हेर्दिन उनलाई भनेर पनि ढाँटे होलान् तर देख्नु र हेर्नुमा पक्कै केही फरक हुन्छ नै, नज़र न हो, बिना खबर सिमाना काटे होलान् । मुक्तक -३ अगाडि ठिक्क पार्छन्, पछाडि रिसराग लाउँछन् सम्बन्ध जोड्न अघि गुणन घटाउ भाग लाउँछन् नाफा नोक्सान तौलन्छन् सम्बन्धका व्यापारीहरू मायामा पनि दिल हैन, बनियाँ दिमाग लाउँछन् । मुक्तक -४ इच्छाहरुले सधैं यहाँ जानीजानी छल्दै गयो चाहेको र पाएको बीच खिंचातानी चल्दै गयो ओर्लिन जातले दिएन उक्लिन औकातले दिएन रहर र बाध्यता बीच जिन्दगानी ढल्दै गयो । मुक्तक -५ ढाकेर हेरें, अस्तित्व आफ्नो, अझै मेरो पहिचान उस्तै छ भाकेर हेरें, हर युगमा मान्छे बद्लियो भगवान उस्तै छ आफैंले कुँदेर बगरको ढुङ्गालाई देउता भनेर पूजे पनि डाकेर हेरें, मेरो भगवान, निर्जीव अनि अनजान उस्तै छ ! स्वयम्भु, काठमाडौँ (सुनिल अधिकारीका यी मुक्तकहरु साहित्यकार गोम बिक्रमले संकलन गर्नु भएको हो । नेप्लिज डायस्पोरा पत्रकार सतिश चापागाईंको सम्पादकत्वमा अमेरिकाबाट संचालन हुने अनलाइन हो । तपाई पनि नेप्लिज डायस्पोरामा साहित्यिक रचना पठाउन चाहनुहुन्छ भने गोम बिक्रमको फेसबुक (https://www.facebook.com/gom.bicram) मा सम्पर्क गर्नुहोला । नेप्लिज डायस्पोराको फेसबुक पेज https://www.facebook.com/nepalesediaspora लाइक गर्न र युट्युब च्यानल https://www.youtube.com/nepalesediaspora लाई सब्स्क्राइब पनि गर्नु होला। -सम्पादक ।) https://youtu.be/-nOYsZW0UEg   https://youtu.be/enSHw4h0vKU