"बाबा भनेको त भगवान् हुन् ।" भन्दै आमाले बाबाको गोडामा शीर निहुर्याएर ढोगेको देखे देखि नै हो सानीले बाबालाई र बाबा जस्तै देखिने काका बाउ, सान बाउ, ठूलो बाउ तल्लो घरको बडा बाउ माथिल्लो घरको अंकल र बाबा जस्तो अनुहार भएको गाउँभरिको दाजु भाई र मामाहरुलाई भगवान जस्तै मानेकी । "भगवान् भनेको त ईश्वर हुन् ईश्वरले भनेको सबै कुराहरु मान्नुपर्छ नाई भन्नू हुन्न , ईश्वर रिसाए चिताएको कुराहरु कहिल्यै पूरा हुँदैन नि फेरि... आमाको दोस्रो वचन पूरा गरिरहे र,,, कहिले विरोध गरिन सानीले उसको कोमलांगहरुमा जतासुकै , जहिलेसुकै सल्बलाई रहने बाबा जस्तै अनुहार भएको ईश्वरहरुको हात । सानीको कलिलो मस्तिष्कले बुझिसकेको छ आमाले भन्नू भएको भगवान् दयालु छैनन् ! पटक्कै छैनन् !! तर, उसको धेरथोर मनोकामना भने अवश्यै पूरा गरिदिन्छ ... हजुर अामाले- छोरी भएपछि सधैं अाज्ञाकारी हुनुपर्छ भन्नू भएको देखि हो त्यसले चुपचापसँग मानी बस्छ बाबा जस्तै प्रत्येक ईश्वरको अाज्ञाहरू र कसैलाई भन्दिनन्, ईश्वरले दिएको असहाय पीडाहरूको कथा देखाउँदिन ऊ कहिल्यै ईश्वरको हातले नङ्ग्र्याएको उसका अङ्गहरू लुकाएर राख्छिन् कोमल अङ्गहरूमा छापिदिएको नीलडामहरू... यसरी नै हुर्किन्छन् थुप्रै थुप्रै सानीहरू । अब त सानी ईश्वर चिन्ने भई सकी , कति कति सानीहरू बाबा जस्तै ईश्वरलाई खुशी पार्दै अाफ्नो रहर- इच्छाहरू पूरा गरि माग्ने भइसकी ! अामाले दिएको शिक्षा र परम्पराहरूलाई दाइजोमा सँगसँगै बोकी ल्याउने कति कति सानीहरूले ठूली भएर पनि आफ्नी छोरीलाई भगवान चिनाउँदै भन्छिन् बाबा भनेको त भगवानको अर्को रुप हो भगवानले भनेका सबै कुराहरू मान्नुपर्छ तर, भन्दैनन् आमाले , "सानी ! बाबा जस्तै अनुहार भएहरूका सबै चाहिँ ईश्वर होइन नि !" "तिनीहरूले भनेको सबै कुराहरू नमान्नु है तिमीले" कुन्नि किन हजुरअामाहरूले सिकाउँदैनन् सानीलाई विरोध गर्नु.... किन होला अााजसम्म पनि सानीले बाबा र बाबा जस्ता देखिनेहरू ऊ जस्तै मान्छे नै हुन भनेर चिन्नुलाई आफ्नो अबोध बालापनको बली चढाउनु परेको !! बाबा जस्तै अनुहार हुने र आमा जस्तै देखिने सबै मान्छे नै हुन सानी, मान्छे साह्रै स्वार्थी हुन्छ है नभुल्नु कहिले तिमीले यो स्वार्थी आमाको कुरा...!! - खर्साङ्ग, भारत । (द्वारिका छेत्रीको यो कविता साहित्यकार गोम बिक्रमले संकलन गर्नु भएको हो । नेप्लिज डायस्पोरा पत्रकार सतिश चापागाईंको सम्पादकत्वमा अमेरिकाबाट संचालन हुने अनलाइन हो । तपाई पनि नेप्लिज डायस्पोरामा साहित्यिक रचना पठाउन चाहनुहुन्छ भने गोम बिक्रमको फेसबुक (https://www.facebook.com/gom.bicram) मा सम्पर्क गर्नुहोला । नेप्लिज डायस्पोराको फेसबुक पेज https://www.facebook.com/nepalesediaspora लाइक गर्न र युट्युब च्यानल https://www.youtube.com/nepalesediaspora लाई सब्स्क्राइब पनि गर्नु होला। -सम्पादक ।)