मुक्तक - १ साथ चाहिँदा विपत्तिमा,सघाऊ बरु जुट्दै नजुटोस् मनभित्रको झिनो आशा,कत्ति पनि टुट्दै नटुटोस् जस्तै परोस् सहिदिउँला, धैर्यशाली रहिदिउँला अन्तिमसम्म जिन्दगीमा, तिम्रो साथ छुट्दै नछुटोस् । मुक्तक - २ जहिले पीडा खप्नुपर्छ,संसारमा दिलदारले मन जितेकै देख्छु बरु,सबै सामु लोकेचारले एउटा कुरा बुझ्नुपर्छ,भित्री मनले सोच्नुपर्छ कस्लाई चैन मिल्छ होला, प्रतिशोधको व्यवहारले ? मुक्तक - ३ कति विद्यालयहरू त भौतिक रुपमा जीर्ण हुन्छन् व्यवस्था सबै लथालिङ्ग, सुधार्नेहरू संकीर्ण हुन्छन् दुनियाँ दिइन्छ आशाहरू विज्ञापनका भाषाहरू ‘सर्वोत्कृष्ठ नतिजा सहित, शतप्रतिशत उतीर्ण हुन्छन् ।’ मुक्तक - ४ सुन्दिनु पर्ने निकायले,सुन्दिने कतै कान छैन देख्दिनु पर्ने जिम्मेवारको, शायद अझ ध्यान छैन अरू उठे महलहरू, उठ्दैन किन पहलहरू ? ऐतिहासिक धरहराको,अचेल नामोनिशान छैन । मुक्तक - ५ साथबिना अधुरा हामी, एकांकी कसरी चुन्छौं होला महत्वाकांक्षाको उडानमा, चन्द्रमा कसरी छुन्छौं होला विश्वासको जग हाल्नुपर्यो, नयाँ जिन्दगी थाल्नुपर्यो 'तिमी' र 'म' एक नभई, 'हामी' कसरी हुन्छौं होला ? ✍ गोम बिक्रम कल्लाबारी, पाल्पा । २०७७ जेठ ६