मुक्तक - १.
जहाँ बोलाउँछौ त्यही सरिक बनियो
चाकडीले होइन सम्मानले, ठिक बनियो
वचनमा पक्का छौ, व्यवहारिक पनि छौ
त्यही भएर तिमीसँग , नजिक बनियो ।
मुक्तक - २.
अलिकति मेरो खुसी, खपत गरिदियौ
प्रगति नचाहनेसँग , सङ्गत गरिदियौ
सुख-दुःख दुवैमा, उस्तै माया हुनुपर्छ
तर तिमीले परिभाषा, गलत गरिदियौ ।
मुक्तक - ३.
कालो विचारसँग घनीभुतले, भिड्न दिएनौ
त्यसको शिर छुटिने गरी, गिड्न दिएनौ
बरु उल्टै मेरो खुट्टा, तान्ने काम धेरै गर्यौ
गन्तव्यमा पुग्नु थियो, हिँड्न दिएनौ ।
मुक्तक - ४.
कमजोर डालीमा, समाऊ भनेर हुँदैन
छुद्र बोली वचनमा, रमाऊ भनेर हुँदैन
दिनहुँ स्वाभिमानमा, प्रहार गर्छ भने
सहनशीलको उपमा, कमाऊ भनेर हुँदैन ।
मुक्तक - ५.
मनका भावना कापीमा, केर्दै गइन्छ
बेला बेलामा भावहरू, फेर्दै गइन्छ
कसले हौसला दिन्छन्, कसले घृणा
लेख्दै जाँदा सबै व्यबहार हेर्दै गइन्छ ।
- इच्छाकामना- १ , चितवन ।
.png)
