दर्पण तिमिल्सिना
ओस्लो, नर्वे

अन्तर्राष्ट्रिय नेपाली साहित्य समाज नर्बेले राष्ट्रिय विभुति युवाकवि मोतिराम भट्टको १५५ औं जन्म जयन्तिको अवसर पारेर रचना वाचन कार्यक्रम सम्पन्न गरेको छ । कोरोना कहरको विषम परिस्थितिका कारण अनलाइन प्रविधि मार्फत विभिन्न साहित्यकारहरुको उपस्थितिमा कार्यक्रम सम्पन्न गरेको हो । जुम मार्फत करिब ३ घन्टा चलेको उक्त कार्यक्रममा विभिन्न देशमा छरिएर रहनुभएका ३ दर्जन बढी नेपाली साहित्यकारहरुले आफ्ना रचना वाचन गर्नुभएको थियो ।

अनेसास नर्वेकी अध्यक्ष विष्णुमाया विभुको सभापतित्वमा सम्पन्न उक्त भर्चुअल कार्यक्रमको प्रमुख आतिथ्य नेपालबाट गजल ज्ञानमणी प्रा. डा.घनश्याम परिश्रमीले गर्नु भएको थियो । प्रमुख अतिथि डा.परिश्रमीले मोतिराम भट्टले नेपाली साहित्य जगतमा पुर्याउनु भएको योगदानको बारेमा चर्चा गर्नु भएको थियो।

साथै, कार्यक्रममा बोल्दै अनेसास नर्वेको कार्यसमिति सल्लाहकार प्रा.डा. बिशाल सिटौलाले साहित्य र समाजको सम्बन्ध बारे आफ्ना बिचार राख्नु भएको थियो । कोभिड-19 ले अस्तब्यस्त विश्व परिवेशमा हरेक दिन आइरहेका नकारात्मक समाचारहरुको बिचमा साहित्यले सकारात्मक सन्देश दिन सक्ने भएकोले यस्ता कार्यक्रमको महत्व बढ्दै गइरहेको बनाउनु भएको थियो ।

कार्यक्रममा नेपालबाट साहित्यकारहरु गोर्खे साँहिलो, भुपेन्द्र शर्मा , सदानन्द अभागी , कृष्ण देवी शर्मा, गजलकारहरु धनराज गिरी, प्रिया पत्थर श्रेष्ठ, कविहरु सन्तोष कु. पोख्रेल , ओम कु. बन्जारा लगायतका विशिष्ट व्यक्तित्वहरुले आफ्ना रचना बाचन गर्नु भएको थियो ।

त्यसै गरि साहित्यकार शारदा पौडेल निशा (स्पेन), पुर्ण कुमार शर्मा (भारत) , कवि सुधिर राना (फ्रान्स), अर्जुन राज पन्त (अमेरिका) , हरि प्रसाद अधिकारी (अष्ट्रेलिया), सन्तोष समिप लुइँटेल (साउदी अरब)ले विभिन्न रचना प्रस्तुत गर्नु भएको थियो ।

अनेसास नर्वे च्याप्टरका कार्यसमिति उपाध्यक्ष राजन सुवेदीको स्वागत मन्तव्यबाट सुरु गरिएको कार्यक्रमको सहजिकरण च्याप्टर कि अध्यक्ष बिष्णुमाया विभुले गर्नुभएको थियो।