मुक्तक - १
कहीं महल लिफ्ट चढ्ने, कहीं झुपडी लिस्नु छैन
कहीं गोदाम टन्न कतै, अन्नको दानो पिस्नु छैन
कुन आँखाले हेरि बसूँ ?, कुन शब्दले केरि बसूँ ?
कोही घरमा वियर ह्विस्की, कहीँ खोले सिस्नु छैन ।
मुक्तक - ३
करूणा-धर्म आत्मियता छ, प्रेमले गास रेटिदैन
छल-कपट बेइमान त, गाउँलेको पास भेटिदैन
देश-विदेशमा जहाँ डुल, शहरतिर जति भुल
गाउँकै आटो-ढिँडो प्यारो,महीको प्यास मेटिदैन ।
मुक्तक -४
दैवि प्रकोप अनिकालले, हाडछाला भै ढले पनि
कोही र केही नहुनेलाई, जिम्मेवारले छले पनि
आफूलाई कतै नपरेसम्म, आफन्त कतै नमरेसम्म
महललाई के सुर्ता भो, झुपडी सारा जले पनि ।
मुक्तक -५
कमी छैन केहीको कहिले, उस्तै भरिला गोजी छ कहीं
कल्पवृक्ष झैं कल्पे पुग्ने, सुविधा रोजी रोजी छ कहीं
दैवी प्रकोप र महामारी, सरकार छैन सरोकारी
भोक नलाग्ने ओखतीको, बिचरा अझै खोजी छ कहीं ।
✍ गोम बिक्रम
कल्लाबारी, पाल्पा ।
२०७७ पौष १५
पत्रकार सतिश चापागाईंको अभिनय रहेको यो म्युजिक भिडियो हेर्नुहोस।
.png)
