मुक्तक - १
अनाहक अरूको डाहमा जल्दैछ जिन्दगी
मैनबत्ती झैं बिना अर्थ गल्दैछ जिन्दगी
समय रहँदै होश् नखुलेको परिणाम
डुब्न लागेको घाम जस्तै ढल्दैछ जिन्दगी ।
मुक्तक - २
बुढेसकालमा पाल्छु भन्नेले बगरमा छाडी गयो
पछि लिन आउँछु भन्दै फर्की नहेरी अगाडी गयो
कसले मुक्त गरिदेला अब मलाई यो नर्कबाट
सुन्दैछु आजभोली ऊ रोजगारीको लागि खाडी गयो ।
मुक्तक -३
टुक्रिँदैछन् बिस्तारै सयथुङ्गा माला पनि
बिर्सिएछन् आफ्नैको चड्कने हो गाला पनि
हिमाल, पहाड, तराई जतासुकैका हुन्
सहोदर दाजु भाइ सम्झ गोरा काला पनि ।
मुक्तक - ४
डढेको हृदय साम्य पार्न खोज्छु बोट लगाएर
पल्लवित हुनै लाग्दा जान्छौ फेरि चोट लगाएर
छेपाराले रंग फेरे झैं बद्लिने तिम्रो स्वभाव
खै के को विट मार्यौ मेरो प्रेममा खोट लगाएर ।
मुक्तक -५
आफू रित्तिएर पनि खुशी किन्न सकिएन
खुशी थियो बन्धक ऊसँग छिन्न सकिएन
लुट्नसम्म लुट्यो खुशी दिन्छु भन्ने बहानामा
चुम्बक नेतको मान्छे रैछ चिन्न सकिएन ।
- भैंसेपाटी, ललितपुर
हाल : अमेरिका
.png)
