रोशनबहादुर सिंह
अमेरिका
‘साथी’ शब्दले आफैमा ठूलो महत्व बोकेको छ । मानिसको जीवनमा साथीको महत्व निकै धेरै छ । जुन बर्णन गरेर सायद अपुरो नै होला । अमेरिकाको बाल्टिमोरमा पनि 'साथी' नामक एक संस्था छ । जसले बाल्टिमोरमा रहेका नेपालीहरुलाई विभिन्न तरिकाले सहयोग गरिरहेको हुन्छ । चाहे त्यो सानै किन नहोस !
स्थापना भएदेखि नै बाल्टिमोरमा रहेका नेपालीहरुलाई विभिन्न तरिकाले सहयोग गरिरहेको साथी संस्था समयसँगै आफुलाई बृहत बनाउँदै अगाडी बढिरहेको छ । यहि संस्थाले बाल्टिमोरमा खेलकुदको माध्यमबाट युवाहरुलाई एकजुट गराउने उद्देश्यले तीन बर्ष अगाडी साथी कप क्रिकेट प्रतियोगिताको सुरुवात गरेको थियो ।
हुन त अमेरिकामा विभिन्न संस्थाले बिभिन्न खेलकुदका गतिविधीहरु गरिरहेका हुन्छन । जसको आफ्नै महत्व रहेको छ । तर साथी संस्थाले आयोजना गर्ने क्रिकेट प्रतियोगिताले बाल्टिमोरमा नेपाली युवाहरुमाझ केहि फरकपन ल्याएको छ ।
तीन बर्ष अगाडी सुरु भएको साथी कप क्रिकेट प्रतियोगिताको तेस्रो संस्करण अर्को महिनाको सुरुवातमा हुँदैछ । श्रम दिवसको मौका पारेर हुने गरेको यो प्रतियोगिता तेस्रो संस्करणसम्म पुग्दा धेरै किसिमले परिवर्तन भएको छ । चाहे त्यो पुरस्कार राशी होस या सहभागिता जनाउने टिमको संख्याका हिसावले।
नेपालमा क्रिकेटको क्रेज पछिल्लो पटक निकै बढिरहेका बेला क्रिकेटमा चासो राख्ने युवाहरुका लागि यो प्रतियोगिताले ठूलो महत्व राखेको छ । साथी संस्थामा आबद्ध भएका युवाहरु बाल्टिमोरमा हुने कार्यक्रम भएको खण्डमा संयमसेवक भएर सहयोग गर्ने मात्र होइन, सहयोगका लागि तयार हुने गरेका छन ।
साथी बाल्टिमोरले क्रिकेट प्रतियोगिताको आयोजना गरेपछि सो स्थानमा खेलकुदका गतिविधीहरु बढेको भन्दा कम नहोला । पहिलो संस्करणको क्रिकेट प्रतियोगिता गर्दा यसलाई सफल पार्नका लागि धेरै हातहरु अगाडी आएका थिए । सो संस्करणमा मात्र ६ टिमको सहभागिता रहेको प्रतियोगिताको पुरस्कार राशी पनि पहिलो हुनेलाई २५ सय र दोस्रो हुनेलाई १५ सय रुपैयाँ थियो । पहिलो संस्करणको प्रतियोगिता नेपाली क्रिकेट टिमका पूर्व कप्तान पारस खड्काले क्रिकेटमा पुर्याएको योगदानमा समर्पण गरेको थियो ।
साथीले आफ्नो दोस्रो संस्करण क्रिकेट प्रेमी भारत्तोलनका अन्तराष्ट्रिय खेलाडी रुप कार्कीको सम्झनामा समर्पण गरेको थियो । लामो समय अमेरिकामा बसेर एनआरएनएमा सक्रिय रुप कार्कीको नेपाल गएका बेला निधन भएको थियो। उनको नाम राखेर रुप स्मृती भनेर आयोजना गरेको थियो । जसको पुरस्कार राशी पहिलो संस्करणको भन्दा बढाएर पहिलो हुनेले ३५ सय र दोस्रो हुनेले दुई हजार बनाइएको थियो । जसमा टिमको संख्या पनि बढाएर आठ पुर्याइएको थियो। सो संस्करणमा यो प्रतियोगिताको पहिलो पुरस्कारका लागि घिमिरे होम्सले प्रायोजन गरेको थियो ।
यसैबीच साथीले आगामी सेप्टेम्बर दुई, तीन र चार तारिखमा तेस्रो संस्करणको खेल प्रतियोगिता आयोजना गर्दैछ । प्रतियोगितामा सहभागि सबै टिमहरु तयारीमा जुटेका छन । यो पटक टिम दर्ताका लागि साथी बाल्टिमोर क्रिकेट क्लबले आवेदन खुल्ला गरेको दुई घण्टामा नै पुरा भएको साथी बाल्टिमोर क्रिकेट क्लबका म्यानेजर उत्सव सिग्देलले जानकारी दिए ।
यो पटक प्रतियोगिताको पहिलो पुरस्कार पाँच हजार डलर रहेको छ भने दोस्रो पुरस्कार तीन हजार डलर रहेको छ । जसमा यो पटक पहिलो पुरस्कारको प्रायोजन अनेस्ट रियल स्टेट र यस्टिम बिल्डर्सले गरेका छन । यस्तै गोल्ड प्रायोजकमा लुसिड टाइटल रहेको छ । यस्तै विभिन्न शिर्षकमा प्रायोजनहरु पनि भित्रिएको आयोजकले बताएका छन ।
यो प्रतियोगिताका लागि सहभागि १२ वटै टिमले आफ्नो तयारी अन्तिम चरणमा पुर्याएका छन भने आयोजक टिमको तयारी पनि अन्तिम चरणमा पुगेको छ ।
खर्चका हिसाबले पनि यो प्रतियोगिता पहिलो संस्करण भन्दा अहिले तेब्बर नै भएको छ । यो पटक प्रतियोगिता आयोजनाका लागि खर्च करिव २० हजार डलर अनुमान गरिएको छ ।
१२ टिमले भाग लिने प्रतियोगितामा सहभागिलाई तीन समुहमा विभाजन गरिएको छ । जसमा हरेक समुहबाट एक टिम सेमिफाइनलमा प्रवेश गर्नेछन । प्रतियोगितामा अमेरिकाका विभिन्न क्षेत्रका टिमले प्रतिस्पर्धा गर्नेछ । यसअघिका दुई संस्करणमा दुबै पटक एभरेष्ट लायन्स टिम विजेता बनेको इतिहास छ ।
साथी बाल्टिमोरले क्रिकेटका माध्यमबाट बाल्टिमोरमा नै एउटा राम्रो क्रिकेट मैदानको अवधारणा अगाडी बढाएको छ । जसका लागि काउन्टिले अघिल्लो बर्ष साढे दुई लाख अमेरिकी डलर बजेट छुट्याएको थियो भने यो पटक पनि सो शिर्षकमा बजेट पारित गरेको छ । तर सो मैदानका लागि काम अगाडी बढाउन भने अझै केहि समय लाग्ने देखिएको छ ।
.png)
