मेरिल्याण्डको बाल्टिमोरमा आजबाट सुरु भएको साथी कप क्रिकेट प्रतियोगिताको पहिलो दिनका खेल सकिँदा बोस्टन अल स्टार्सको दुबै टिमले सेमिफाइनलको संभावना कायमै राखेका छन । यस्तै ह्यारिसबर्ग गुर्खाज, हन्टर्स ब्याइजले पनि आफ्नो पहिलो खेलमा जित निकालेका छन । फारवेष्र्टन क्रिकेट क्लब र बाल्टिमोर एथ्लेटिक क्लब भने समुह चरणबाट बाहिरीएका छन ।

हावार्ट काउन्टीको क्रिकेट मैदानमा भएको पहिलो दिनको खेलमा फार वेष्र्टन क्रिकेट क्लब आफ्नो दोस्रो खेलमा हिमालयन किंग्ससँग २५ रनले पराजित भयो । पहिले ब्याटिङ गरेको किंग्सले दिएको एक सय एक रनको लक्ष्य पक्ष्याएको फारवेष्र्टन ७५ रनमा अलआउट भयो । यस्तै अर्को खेलमा फारवेष्र्टन बोस्टन अल स्टार्सको ग्रिन टिमसँग १३ रन हार्न पुग्यो । बोस्टनले दिएाके ७४ रनको लक्ष्य पक्ष्याएको सुदुरपश्चिम ६० रनमा अलआउट भयो ।

यस्तै बाल्टिमोर एथ्लेटिक क्लबले पहिलो खेलमा हन्टर्स ब्याइजसँग पहिलो खेलमा ४७ रनको हार ब्यहोरेको थियो भने मेरिल्याण्ड क्रयाबसँग स्कोर टाई भएपनि एक अंक हासिल गरेको थियो । जसका कारणपनि उसको यात्रा समुह चरणमा नै सकिएको छ ।

आयोजक साथी बाल्टिमोर क्रिकेट क्लब ह्यारिसबर्ग गुर्खाजसँग सात विकेटले पराजित भयो । साथी टिमले दिएको ५८ रनको लक्ष्य ह्यारिसबर्गले तीन विकेट गुमाउँदै पुरा गरेको थियो । यता बोस्टन अल स्टार्सको ब्लु टिमले विनचेस्टर युनाइेटड ब्लुलाई पाँच विकेटले हरायो । ३८ रनको लक्ष्य बोस्टर अल स्टार्स ब्लुले पाँच विकेट गुमाउँदै पुर्याएको थियो ।

पहिलो दिनको खेल सकिँदा अंक तालिकामा समुह ए बाट हन्टर्स ब्याइजको दुई अंक भएको छ भने मेरिल्याण्ड क्रयाबको एक अंक छ । अब क्रयाबलाई सेमिफाइनलमा पुग्न हन्टर्सलाई हराउनुपर्नेछ ।

समुह बी मा ह्यारिसबर्गले एक खेलबाट दुई अंक बनाएको छ । उसले अब एक खेल खेल्न बाँकी रहेको छ । दुई पटकको च्याम्पियन एभरेष्ट लायन्सले आइतबार दुबै खेल खेल्नेछ । आयोजक साथी बाल्टिमोरका लागि पनि सेमिफाइनलको संभावना कठिन बनेको छ । उसलाई सेमिफाइनल पुग्नका लागि चमत्कारिक नतिजा आउनुपर्नेछ ।

समुह सी बाट हिमालयन किंग्स र बोस्टन अल स्टार्स ग्रिनको दुई दुई अंक भएको छ । अब सेमिफाइनलमा यी दुई टिमको विजेता पुग्नेछ । फारवेष्र्टन भने अंकको खाता नखोली प्रतियोगिताबाट बाहिरीएको छ ।
समुह डी मा बोस्टनको ब्लू टिमले दुई अंक बनाएको छ । उसलाई सेमिफाइनलमा पुग्न आफ्नो बाँकी एक खेल जित्नुपर्नेछ । यो समुहमा युनाइटेड क्रिकेट टिमले कुनै खेल खेलेको छैन ।

साथी बाल्टिमोरको आयोजनामा तीन दिन चल्ने प्रतियोगिताको हरेक समुहका विजेताले सेमिफाइनलमा स्थान बनाउनेछन । फाइनल खेल सोमबार हुनेछ ।

प्रतियोगिताको विजेताले पाँच हजार अमेरिकी डलर पाउनेछ भने उपविजेताले तीन हजार डलर पाउनेछ ।

प्रतियोगिताको मुख्य प्रायोजक अनेस्ट रियल स्टेट र स्टिम बिल्डर्स रहेका छन । गोल्ड स्पोन्सर्समा लुसिड टाइटल रहेको छ ।