नेपाल भलिबल संघले राष्ट्रिय टोलीमा रहेका खेलाडीलाई मासिक रूपमा पारिश्रमिक दिने भएको छ ।

संघले मंगलबार पत्रकार सम्मेलन गर्दै राष्ट्रिय टोलीमा रहेका १२ महिला तथा १२ पुरुष खेलाडीलाई मासिक ५ हजार पारिश्रमिक दिने घोषणा गरेको हो । खेलाडीलाई सेप्टेम्बर, अक्टोबर र नोभेम्बर गरेर ३ महिनाको पारिश्रमीक दिइएको छ । नेपाली भलिबल खेलाडीले पहिलो पटक मासिक पारिश्रमीक पाएका हुन् । 

अमेरिकामा रहेका पूर्वराष्ट्रिय खेलाडी राम श्रेष्ठको नेतृत्वमा पूर्वराष्ट्रिय खेलाडी र विजनेश इन्टरप्रेनियरको सहयोगमा मासिक पारिश्रमीकको व्यवस्था गरिएको बताईएको छ ।

नेपाली भलिबल टीम हाल चीनमा हुने १९ औं एसियाली खेलकुदको तयारीमा छ । खेलाडीलाई मासिक तलब दिने भलिबल संघ चौथो हो । यसअघि फुटबल र क्रिकेट खेलाडीले मासिक तलब पाइरहेका छन् । यसैगरी बुद्धीचालका पुरुष तथा महिलामा शीर्ष वरियताका खेलाडीले पनि मासिक तलब पाउने गरेका छन् ।