राष्ट्रिय क्रिकेट टोलीका कप्तान रोहित पौडेलले, क्रिकेटको विकासका लागि अब पूर्वाधारमा लगानीका लागि ढिला गर्न नहुने बताएका छन् ।

एसिया कप खेलेर स्वदेश फर्किएपछि त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै कप्तान पौडेलले पर्याप्त तयारी विना सफलता हासिल हुन नसक्ने भन्दै अब भौतिक पूर्वाधारमा लगानी गर्न आवश्यक रहेको बताए ।

 ‘अब चाहिँ हाई टाइम भई सक्यो, इन्फ्रास्ट्रक्चर (पूर्वाधार)मा इनभेस्ट (लगानी) गर्नुपर्छ। जहिल्यै पनि ती कुराहरूमा सङ्घर्ष गरिरहेका हुन्थ्यौँ हामी ।’ उनले भने ‘डोमेस्टिक स्ट्रक्चर छैन केही पनि । प्रत्येक प्रदेशमा ग्राउन्ड खास गरी पिचहरू भयो भने तयारी गर्न सकिन्छ।’

यो खेलबाट नेपालले धेरै कुरा सिक्न सकेको उनले बताए । विशेष गरी भारतसँग नेपालको खेलबाट आफू धेरै खुसी भएको बताए । 

विश्वका उत्कृष्ट बलरहरूलाई सामना गर्न नेपाली टोली सफल हुनु नै ठुलो कुरा भएको उनले बताए। 

एसिया कपमा नेपालले विश्व क्रिकेटका दुई महाशक्ति भारत र पाकिस्तानसँग खेलेको थियो।