अघिल्लो साता आयोजना भएको साथी कप क्रिकेट प्रतियोगिताको आयब्यय खर्च सार्वजनिक गरिएको छ । साथी बाल्टिमोरको आयोजनामा भएको सो प्रतियोगिताबाट आयोजकलाई एक हजार नौं सय ४२ डलर नाफा भएको छ । तर यो नाफा सहयोग गर्छु भनेर बाचा गरेका ब्यक्तिबाट उठेपछिमात्र हुने साथी बाल्टिमोरले जनाएको छ ।
फेसबुक पेजबाट सार्वजनिक गरेको हिसाबकिताबमा प्रतियोगिताका लागि कुल ३० हजार एक सय ४२ रनक संकलन भएको र २८ हजार दुई सय डलर खर्च भएको जनाएको छ । १२ टिमको सहभागिता रहेको प्रतियोगिताका लागि दर्ता शुल्क एक हजार डलर राखिएको थियो । जसबाट ११ हजार डलर उठेको थियो । डोनेसनबाट १७ हजार दुई सय ८९ डलर उठेको थियो भने अझै उठ्नबाँकी एक हजार आठ सय ५३ डलर रहेको छ ।
खर्चमा पहिलो पुरस्कारका लागि ५ हजार डलर, दोस्रोका लागि ३ हजार डलर रहेको थियो । यो संस्करणमा आयोजकले नै सबै टिमलाई जर्सी उपलब्ध गराएको थियो । जसका लागि आठ हजार ८ सय ४३ डलर खर्च भएको जनाएको छ ।
यस्तै प्रतियोगिताका बेला खाना खर्च पाँच हजार चार सय ५०, पानी तथा अरु पेय पदार्थमा ८ सय ६२, ट्रफी बनाउन एक हजार ४५, खेल मैदान तथा अम्पायरको खर्च ३ हजार सात सय ५० रहेको छ । यस्तै ग्राफिक डिजाइनरको खर्च दुई सय ५० डलर भएको जनाएको छ ।
तीन दिनसम्म चलेको प्रतियोगिताको उपाधि ह्यारिसबर्ग गोर्खाजले जितेको थियो । फाइनलमा उसले बोस्टन अल स्टार्सलाई पराजित गरेको थियो ।
