अमेरिकी उपराष्ट्रपति कमला ह्यारिसको जीवनीमा आधारित पुस्तक नेपालीमा अनुबादन गरिएको छ । सो पुस्तकको नेपाली संस्करण शनिबार काठमाडौँमा सार्वजनिक गरिएको छ ।

‘द ट्रुथ वी होल्ड’ को नेपाली अनुवाद गरेर ‘सत्यको जगमा उभिएर’ नामक पुस्तक सार्वजनिक भएको हो । अनुवाद विप्लव प्रतीक र लेखक तथा अनुवादक सगुना शाह र वी  रीडको सीइओ सुनिती अमात्यले सामुहिक रूपमा पुस्तक विमोचन गरे । 

रंगभेद तथा बालबालिका र महिलामाथिको विभेद, अदालतमा बयान दिदा उनीहरुको परिस्थितबारे ह्यारिसले गरेको अनुभव आफूलाई मन परेको शाहले बताइन् ।  आप्रवासी आन्दोलनदेखि समलिंगी, तेस्रोलिंगी, आर्थिक व्यवस्था लगायतका विषय पनि महत्वका साथ आएको उनको भनाइ थियो ।

विमोचनअघि अनुवादक प्रतीकसँग शाहले संवाद गरेकी थिइन् । कमला ह्यारिसलाई कसरी सत्यको जगमा उभिएको पाउनुभयो भन्ने प्रश्नमा प्रतीकले सुरुवातीदेखिकै हरेक यात्रा र संघर्षमा हमलाले सत्मार्गमा हिँडेको आफूले पाएको बताए । ‘उनको जीवन नै हरेक मानिसलाई प्रेरणा र ऊर्जा दिने दिने खालको छ,’ उनले भने ।

दुई वर्षअघि नै पुस्तकको काम थालिए पनि विविध प्राविधिक कारण ढिलाइ हुन पुगेको प्रतीकले बताए ।