इजरायल र हमासबीच युद्ध जारी छ । दुवैतर्फ गरी अहिलेसम्म ७ सयभन्दा बढी मारिएका छन् भने हजारौँ मानिस घाइते भएका छन् । इजरायलतर्फ ३ सयभन्दा बढी र प्यालेस्टाइनतर्फ ४ सयभन्दा बढी मानिसको मृत्यु भएको इजरायली अखबार जेरुसलेम पोस्टले लेखेको छ ।
हिजो शनिबार बिहान हमासले गरेको आक्रमणमा दक्षिणी इजरायलमा केही नेपाली विद्यार्थी पनि घाइते भएका छन् ।यसबाहेक अन्य कुनै पनि ठाउँमा नेपाली समुदायलाई कुनै नोक्सानी भएको खबर छैन ।
कति छन् इजरायलमा नेपाली ?
परराष्ट्र मन्त्रालयका अनुसार, इजरायलमा हाल ४५ सय नेपाली श्रमिक केयर गिभरका रूपमा कार्यरत छन् । अनौपचारिक तथ्याङ्कअनुसार भने योभन्दा तेब्बर बढी संख्यामा नेपालीहरू इजरायलमा काम गर्छन् ।
इजरायलका विभिन्न शहरमा बसेर अध्ययनरत विद्यार्थीको संख्या २ सय ६५ छ । उनीहरू इजरायल सरकारको सिक्दै कमाउँदै कार्यक्रम अन्तर्गत इजरायल पुगेका हुन् ।
यसरी जानेहरूमा कृषि विश्वविद्यालयबाट १ सय १९, त्रिभुवन विश्वविद्यालयबाट ९७ र सुदूरपश्चिम विश्वविद्यालयबाट ४९ जना छन् ।
सुदूरपश्चिम विश्वविद्यालयका १७ जना
२ सय ६५ मध्ये पनि सुदूरपश्चिम विश्वविद्यालयबाट ४९ इजरायल पुगेका छन् । यीमध्ये १७ जना विद्यार्थी दक्षिणी इजरायलको किबुज अलुमिम क्षेत्रमा रहेको कृषि फार्मका काम गर्दै पढ्छन् ।
तेलअभिभस्थित नेपाली दूतावासका अनुसार, विवादित गाजा नजिकै रहेको किबुज क्षेत्रमा हमासले आक्रमण गरेकाले केही नेपाली विद्यार्थी घाइते भएका छन् । १७ मध्ये २ जना सकुशल रहेको, ३ जना घाइतेको उपचार भइरहेको, १२ जना मध्ये केही सम्पर्कमा नरहेको र केही हताहत भएको हुन सक्ने परराष्ट्रमन्त्री एनपी साउदले बताएका छन् । इजरायलमा भएको घटनालाई सरकारले गम्भीर रूपमा लिएको पनि मन्त्री साउदले बताए ।
.png)
