श्रीलंकाको खेलकुद मन्त्रालयले त्यहाँको राष्ट्रिय क्रिकेट बोर्डलाई निलम्बन गरेको छ । गत वर्ष श्रीलंकामा भएको टी-ट्वेन्टी विश्वकपको विषयमा अडिट रिपोर्ट सार्वजनिक भएपछि त्यहाँको समिति निलम्बन गरिएको हो ।

खेलकुदमन्त्री रोशन रानासिंगेले सोमबार सूचना जारी गर्दै अन्तरिम अध्यक्षसहित समिति बनाएको जानकारी दिएको छ । नयाँ समितिमा तीन पूर्वन्यायाधीशसमेत छन् । अब अडिट रिपोर्टको विस्तृत अनुसन्धानपछि पहिलेको बोर्ड सदस्यहरुलाई कारबाही हुनेसम्मको चेतावनी मन्त्रालयको सूचनामा छ ।

सन् १९९६ मा श्रीलंकाले विश्वकप जित्दा टिमका सदस्य रहेका अर्जुना रनातुंगाको अध्यक्षमा अहिले नयाँ टिम बनेको छ । अन्तरिम समितिमा सात सदस्य छन् । त्यहाँको सरकारले भ्रष्टाचार र अनियमितताका कारण बोर्ड निलम्बन गरेको जनाएको छ ।

क्रिकेट बोर्डप्रति देशव्यापी आक्रोश बढेपछि मन्त्रालयले यस्तो कदम चालेको अन्तर्राष्ट्रिय सञ्चारमाध्यमहरुले उल्लेख गरेका छन् । आईसीसी क्रिकेट विश्वकपमा आज श्रीलंकाले बंगलादेशको सामना गर्दै छ ।