बेलायतको विभिन्न काउन्सिलमा निर्वाचित कन्जरभेटिभ पार्टीका नेपाली मूलका काउन्सिलरहरुले बेलायती प्रधानमन्त्रीसमक्ष गोरखाहरुमाथिको पेन्सनको भेदभाव हटाउन ज्ञापन पत्र बुझाएका छन् ।

बेलायती प्रधानमन्त्रीको कार्यालय टेन डाउनिङ स्ट्रीटमा गई उनीहरुले प्रधानमन्त्रीका सल्लाहकार अमित जोगियालाई सो ज्ञापत्र पत्र बुझाएका हुन् ।

सो अवसरमा बेलायत सरकारका मन्त्री तथा अल्डरसटका सांसद लियो डोकोर्टी पनि उपस्थित थिए । प्रधानमन्त्री ऋषि सुनकलाई नै सो ज्ञापन पत्र बुझाउने कार्यक्रम रहे पनि सुनक अत्यावश्यक कामका कारण अन्यत्र जानु परेकाले सल्लाहकारलाई सो ज्ञापन पत्र बुझाइएको काउन्सिलर नेम थापाले बताए ।

ज्ञापन पत्रमा गोरखाहरुले बेलायती सेनामा दुई वर्षभन्दा लामो समयदेखि काम गरिररहेको र बेलायत नेपालको सबैभन्दा पहिले दौत्य सम्बन्ध स्थापना भएको मुलुक भएको बताइएको छ । गोरखाहरुले दुई दशभन्दा लामो समयदेखि अभियान गर्दै आएको र कतिपय विषयमा प्रगति पनि भएको उल्लेख गर्नै ज्ञापन पत्रमा गोरखा र बेलायती समकक्षीबीच पेन्सनमा अन्तर रहेकाले सोको समाधानका लागि पहल गर्न अनुरोध गरिएको छ ।

यसैगरी नेपाल र बेलायतबीच दुई शताब्दी पुरानो ऐतिहासिक सम्बन्ध रहे पनि हालसम्म बेलायतको बहालवाला प्रधानमन्त्रीले नेपाल भ्रमण नगरेको उल्लेख गर्दै प्रधानमन्त्री सुनकलाई नेपाल भ्रमण गर्न निम्तो दिइएको छ ।

यसरी ज्ञापन पत्र बुझाउनेहरूमा काउन्सिलरहरू लक्ष्यबहादुर गुरुङ, नेम थापा, जीव बेल्बासे, गोबर्धन सिल्वाल साथै काउन्सिलरको चुनावमा उम्मेदवार रहेकाहरू सुमन पुन, पुनम गुरुङ र ज्ञान गुरुङ रहेका छन् । 

सो टोलीले बेलायतका लागि नेपाली राजदुत ज्ञानचन्द्र आचार्यलाई भेटी बेलायती प्रधानमन्त्रीको नेपाल भ्रमणका लागि पहल गरिदिन पनि अनुरोध गरेको छ ।