" ए तारा ! तारा !! दर खान जाने होइन ?" 

बाहिरबाट चर्को आवाजमा सुनियो ।

  " जाँदै गर्नु, म आउँदै गरौंला !" ताराले उत्तर फर्काई ।

यत्तिकै बोल्दा बोल्दैमा पल्लाघरे आमा टुप्लुक्क आइपुगिन् । 

" तिम्रो बुहारी दर खान जाने रे । " साइली आमाले साउती मार्दै भनिन्, " हाम्री त पहिले नै गइसकी । " 

तारा चिटिक्क परेर भन्दै थिई, " आमा म गएँ है । "

" हाम्रो पालामा माइतीमा दर खाएर आइन्थ्यो । अहिलेकालाई पार्टी प्यालेस लगाएर दर नखाइ नहुने ।"  भन्दै मुख बङ्ग्याइन् ।

" त्यही त भन्या । भाद्र  शुक्ल द्वितीयाका दिनमा  मनाउने पर्व तीज हो । पौराणिक धारणा अनुसार, 

पार्वतीले पानी समेत नखाई घोर तपस्या गरेर महादेव आफूलाई मन परेको वर मागेकाले महादेव स्वयं प्रसन्न भएर वर दिएकाले यो चाड मनाउन थालियो । " आमाले  तीजको पौराणिक कथालाई जोडेर भनिन् ।

" हो, त नि, हर्षोल्लासका साथ नाचगान गरी मनाउने  चाड हो । अहिले फेसन गरी मनाउने चाड पो भैदिएको छ । पार्टीको नाममा, संघ सस्थाका नाममा, समूहका नाममा । भित्र जेजे खाए पनि दारु नै खाएर अर्धनग्न भएर नाचेको भिडियो र फोटा त नहाले हुने हो नि ! " लामो श्वास तान्दै उनी घरभित्र पसिन् । 

- पोखरा ।