मुक्तक - १
जगजाहेर छ सबै छल, नराखे पनि हुन्छ
समस्या थपिन्छ हुन्न हल, नराखे पनि हुन्छ
यो ढुङ्गाको बस्ती हो ढुङ्गाहरू मात्रै बस्छन्
यहीँ बस्तीमा शिशा पसल, नराखे पनि हुन्छ ।
मुक्तक - २
दोबाटो आए छुट्न सक्छ, सम्हालेर राख
कतै कसैले लुट्न सक्छ, सम्हालेर राख
उपहारमा सुम्पिएको हुँ, दिल तिमीलाई
हावा चल्दा फुट्न सक्छ, सम्हालेर राख ।
मुक्तक - ३
व्यापारीसँगै व्यापारीले, घुस किन खाएका होलान्
थिच्नेछ घुसकै भारीले, घुस किन खाएका होलान्
घुस लिने दिने देशका, दुश्मन हुन् जानाजानी
हाम्रा देशका कर्मचारीले, घुस किन खाएका होलान् ।
मुक्तक -४
सत्य मात्रै बोल्ने नढाँट्ने, एउटा पागल म पनि हुँ
शत्रुको पनि कुरा नकाट्ने, एउटा पागल म पनि हुँ
चामलसँग पीठो समेत नसाटिने यो बजारमा
मनलाई मनसँग साट्ने, एउटा पागल म पनि हुँ ।
मुक्तक -५
आउला नसोची बाधा, सापटी दिए पुग्छ
एकछिन् भइन्छ आहा!, सापटी दिए पुग्छ
दुश्मन खोज्न टाढा, जानै पर्दैन आमा
आफन्तलाई पैसा, सापटी दिए पुग्छ ।
✍️ रोमा लम्साल "नुरा"
सप्तरी, हाल : काठमाडौं