मुक्तक-१ प्रस्ताव गरी केही भनूँ, धड्कन बढ्छ डर लाग्छ नभनेर मनमा राखूँ, नजिक भई पर लाग्छ संघर्षहरु गर्नै पर्यो, जंघारहरु तर्नै पर्यो काँडाको चोट सहेपछि, फूल अरु सुन्दर लाग्छ । मुक्तक- २ जिन्दगीलाई नयाँ बाटो, हिँडाएर हेरौं क्यारे मायाको कित्ता काटीवरी, चौकिल्लाले घेरौं क्यारे सपनाहरु थारै रहे, खुशी केवल नारै रहे दुइटा मुटु यौटै पारी, अब त साइनो फेरौं क्यारे । मुक्तक-३ उराठ लाग्दो जिन्दगानी, पनि गल्ती ठहरिन लाग्यो शिशिर यामको कष्टपछि,वासन्ती सुवास छरिन थाल्यो आशाका मुना अंकुराए, चाहनाहरु जुर्मुराए तिमी आयौ र जिन्दगीमा, खुशी-उमङ्ग भरिन लाग्यो मुक्तक-४ व्यवहारले नचिनुन्जेल, जस्लाई पनि जाँचिंदो रैछ विपत पर्दा लाएका गुन, जिन्दगीभर साँचिंदो रैछ गुन र बैगुन चिन्नू पर्छ, सत्य बाटोमा हिन्नु पर्छ बदला लिए दु:ख पर्दा, जसको नि मन भाँचिंदोरैछ । मुक्तक-५ विशाल थियो मुटु मेरो, तिमीले भने सानो बनायौ त्यसमा आफू ओतिनलाई, मेरै छाती छानो बनायौ मायाको बाँध फुटाएर, 'लाग्दो माया' छुटाएर आखिर तिम्रै चोटहरुको, मलाई सधै अचानो बनायौ । ✍ गोम बिक्रम कल्लाबारी, पाल्पा । २०७५ फागुन ०७