मुक्तक -१ (टेकराज भट्ट) पत्थर पुजिन्छन् आखिर आस्था पलाएर न हो धामी झाँक्री डाक्टर हुने अन्धताले गलाएर न हो, पेटमा जुका परे जन्तर लगाइन्छ अझै पनि यहाँ समाज सुधार्नु पर्ने उहिले कुप्रथा चलाएर न हो । ................................... मुक्तक -२ (हरि कंडेल) मलाई जिउन जटिल बनायौं, मेरो दिलमा खिल बनायौँ, पराइसँग खुशी मनायौं, आफ्ना रात झिलमिल बनायौं, मलाई छोड्ने निर्णय लिएर, कठोर वचन प्रहार गरी , आफ्नो औकात जनायौँ, मेरा आँखा टिलपिल बनायौं । ............................... मुक्तक-३ (सफल गोले) नठान्नुहोस् कि माटोले घर मात्र टाल्न सक्छु आफ्नो घरबारसँगै देश नै सम्हाल्न सक्छु केवल अवसर मात्र दिई हेर्नुस् मलाई सगरमाथालाई अझै माथी उचाल्न सक्छु । रामेछाप । ................................ मुक्तक-४(गोम बिक्रम) तिम्रो आसमा कुर्दा-कुर्दै, आशै पनि सेलाइसक्यो बाध्यता र विवशताले, झेल्नु हण्डर झेलाइसक्यो फेरि यी दिन कहाँ आउनु, यस्तै जीवन कहाँ पाउनु ? थाहै नदिइ समयले, 'चिप्लेटी' पो खेलाइसक्यो । कल्लाबारी, पाल्पा । .......................... मुक्तक-५(उपेन्द्र ढुंगाना) निस्तो भातसँग श्रीमतीको खुशी साटेकोछ परदेशीले सन्तानको यादमा कैयौं रात रुँदै काटेकोछ परदेशीले जिउभरी चरम यातनाका निलडामहरु लुकाएर 'सन्चै छु' भन्दै धेरै पटक बाआमा ढाँटेकोछ परदेशीले । खैरहनी- ११, चितवन । संकलन : गोम बिक्रम कल्लाबारी, पाल्पा । २०७५ फागुन २७ (सबै मुक्तकहरु मुक्तकहरु साहित्यकार गोम बिक्रमले संकलन गर्नु भएको हो । तपाई पनि नेप्लिज डायस्पोरामा मुक्तक पठाउन चाहनुहुन्छ भने गोम बिक्रमको फेसबुक (https://www.facebook.com/gom.bicram) मा सम्पर्क गर्नुहोला ।-सम्पादक)