मुक्तक -१ अपराधै होस् कसैको त, गल्ती हुँदै नहुँदोरैछ जेसुकै होस् पिडितमा, पत्थरे दिल छुँदै नछुँदोरैछ दोषीलाई ढाकी हाल्छन्, निर्दोषीलाई जाकीहाल्छन् कति 'महाशय'यस्ता छन्, कानूनले छुँदै नछुँदोरैछ । मुक्तक -२ चुनौति दिदै संविधानको, खेला लागेको छ अचेल चुनाव जित्ने आश्वासनको, भेला लागेको छ अचेल धरापमा राखी नैतिकता, बलात्कृत छ राष्ट्रियता नागरिकता दिन सीमातिर, मेला लागेको छ अचेल । मुक्तक -३ लैङ्गिक हिंसा, बुहार्तन, कुरिति उस्तै चलेका छन् दमन उस्तै थिचोमिचो, न त अन्यायी ढलेका छन् अस्तित्व निम्ति जुट्नु पर्यो, अन्यायी विरुद्ध उठनु पर्यो देशका कुना-कप्चेरामा, कैयन नारी जलेका छन् । मुक्तक -४ रडाको ठूलो बेइमानीकै, विवेक राखी गुनिँदैन आफ्ना मात्र जोगाऊँ अरे, असल-खराब चुनिँदैन देश- दुनियाँ चलेकैछ, इमानी सब ढलेकैछ लाज पचाए बेशर्मीले, जायज कुरा सुनिँदैन । मुक्तक -५ आशमा राखी जनतालाई, उचाल्न खुब सुरा हुन्छन् भ्रमको खेती लगाएर, दुनियाँभर कुरा हुन्छन् सहिद दिवस आएपछि, फूलमालाले सजाएपछि आफ्ना सपना पूरा हुन्छन्, शहिदका चैं अधुरा हुन्छन् । ✍ गोम बिक्रम [email protected] कल्लाबारी, पाल्पा । २०७६ जेठ ३