मुक्तक -१ जहिले पनि जहाँ पनि, चलाइरह्यौ छुरीहरु सगरमाथाभन्दा माथि, पुर्यायौ चुरीफुरीहरु ओर्लिनुपर्छ चढेपछि, सीमाना नाघी बढेपछि संसार कस्तो छ मायाबिना, सोची हेर त निष्ठूरीहरु । मुक्तक -२ रमितै गर्छौ जैले पनि, खाल्टो खनी खसाएर दुई ढुङ्गाको तरूल झै, चेंपमा पारी फसाएर फेरि पनि सहँदै आयो, अमिलो मन रहँदै आयो खतिभन्दा नि अति गर्छौ, विरोधीलाई हँसाएर ! मुक्तक -३ विरोधी हौ सँगै बस्ने, मुटु खोली जिऊँ कसोरी ? भरिसकेँ दुबै गिलास, एक्लै बसी पिऊँ कसोरी ? चल्दैन भो जन्ती-मलाम, हामी एक र अर्काविना ! म रूँदा नि हाँस्ने तिम्रो, चित्त बुझाई दिऊँ कसोरी ? मुक्तक -४ तर्दैनन् जँघार कैले दुई, नाउमा पाउ छिराउनेहरू भेटिन्न त्यस्तै सद्भाव झन, बुध्दिको बीउ किराउनेहरू बेलैमा होश पुगेन भने, पहिले आफै जागेन भने लक्ष्यमा कैले पुग्ने छैनन्, बिचैमा बाटो बिराउनेहरू । मुक्तक - ५ नशाको रसले ज्यूँनेहरू, नशाकै सुरमा झुम्छन् सधै लठ्ठीको भरले हिंड्नेहरू, भुइ-भुइँमा घुम्छन् सधै सोचलाई गति दिन सके, दृढ..संकल्पी हुन सके आफ्नै खुट्टाले हिंड्नेहरू, सगरमाथा चुम्छन् सधै । कल्लाबारी, पाल्पा । २०७६ जेठ १०