मुक्तक - १
आफ्नो भुँडी भर्न जसले, मार्छन् अरूका छाकहरू
होइन भनी चोखिनलाई, दिन्छन् उल्टै धाकहरू
कालो दाग मनभित्र छ, छिद्रान्वेषी चरित्र छ
त्यसैले पो 'नकटाहरु', काट्छन् अरूका नाकहरू |
मुक्तक - २
भित्रै पुगेका आँखा अनि, चाउरे गाला पुक्क होलान्
खोक्रिएका आन्द्राभुँडी, दाना पाउँदा भुक्क होलान्
चुनाव जितें भनेदेखि, सपना साकार बनेदेखि
'आफ्नै' विकास मस्तसित, सातै पुस्ता ढुक्क होलान् ।
मुक्तक - ३
प्रतिष्ठालाई च्याँखे थापी, खेल्छन् यस्ता जुवाहरु
'इलम' तिनका सुनेपछि, रुन्छन् आमा-बुवाहरु
दुनियाँमा गनाइरहून्, देशै बदनाम बनाइरहून्
कस्सम रत्ति लाजै हुन्न, खा'रै छोड्छन् साइँदुवाहरु ।
मुक्तक -४
सपना देखाई समृद्धिको, भ्रष्टाचारको खेलमा देख्छु
प्रमाणित दोषी पनि, ढाक्ने जाल र झेलमा देख्छु
सत्य कहिले डग्ने होइन, झुटो कहिले टिक्ने होइन
इमान्दार त सधैभरी, बेइमानीको जेलमा देख्छु ।
मुक्तक -५
लचकदार छ भुँडी अति, जति खाए नि कमै हुन्छ
मौका मिलाइ कोच्न सक्ने, क्षमता हरदमै हुन्छ
चुनाव खर्च पूर्ति गर्न, दुनियाँ सामु फूर्ति गर्न
खानु थियो र खाएकै छु, जे खाए नि हजमै हुन्छ ।
कल्लाबारी, पाल्पा । २०७६ जेठ १०
