मुक्तक-१ जति तिम्लाई सम्झाए नि, मन फेरेनौ रत्ति पनि लुकाईराख्न सक्छौ दोष, भ्रम छरेर जत्ति पनि सबै कुरा बिग्रिइरहुन्, मतलब छैन जेसुकै हुन् माछो पार्न जाल त फेर्यौ, बुद्धि फेरेनौ कत्ति पनि । मुक्तक -२ कहिले भने मुटुभरी, मेरै तस्वीर टाँस्ने भयौ मेरो विरोध सुनिहाले, जाइलागेर मास्ने भयौ हुँदा हुँदै त के भो कुन्नि ?, बदलिएछ मनै पनि,, अचेल तिमी आफै पनि, मेरै दु:खमा हाँस्ने भयौ । मुक्तक-३ तिम्रो बाटो कुर्दा-कुर्दै, आशै पनि सेलाइसक्यो बाध्यता र विवशताले, झेल्नु हण्डर झेलाइसक्यो फेरि यी दिन कहाँ आउनु, यस्तै जीवन कहाँ पाउनु ? थाहै नदिइ समयले, 'चिप्लेटी' पो खेलाइसक्यो । मुक्तक -४ आफ्ना कसुर लुकाइवरी, किच्यौ र पो चिनेँ हजुर पहुँच मिलाई जता पनि, मिच्यौ र पो चिनेँ हजुर वर्ग दुश्मन बनाएर, आफ्नै गल्तीले गनाएर जहिले गला निमुखाकै, थिच्यौ र पो चिनेँ हजुर । मुक्तक - ५ निर्वाहमा चलाउँदा नि, जीवन यसै चल्दोरैछ पौरखले कमाउँदा नि, ईर्ष्यालु मन जल्दोरैछ चिसो चुलो बाल्नुथियो, नयाँ कदम चाल्नुथियो उतै लाग्दा रैछन सबै, जताको आगो बल्दोरैछ । - गोम बिक्रम कल्लाबारी, पाल्पा । २०७६ जेठ १६