काठमाडौं, १५ मङ्सिर ।

ढुवानी (ट्रान्सपोर्ट) व्यवसायीहरूको छाता संगठन ढुवानी व्यवसायी महासंघ नेपालको १२ औँ बार्षिक साधारणसभा तथा पाँचौं महाधिवेशन मङ्सिर १३ गते शनिबार चितवनको पर्यटकीय क्षेत्र सौराहामा सम्पन्न भएको छ ।

कोभिड १९ को कारण नेपाल सरकार स्वास्थ्य मन्त्रालयले तोकेको स्वास्थ्य मापदण्ड पूरा गरि सम्पन्न भएको पाँचौं महाधिवेशनबाट आगामी कार्यकालको लागि नयाँ कार्यसमिति चयन समेत गरिएको छ ।

बार्षिक साधारणसभाबाट पाल्पाको रामपुर नगरपालिका वडा नं १० निवासी अच्युतराज खनाल ढुवानी (ट्रान्सपोर्ट) व्यवसायीहरूको छाता संगठन ढुवानी व्यवसायी महासंघ नेपालकोबरिष्ठ उपाध्यक्ष पद निर्वाचित हुनुभएको हो ।

अध्यक्ष पदका लागि वर्तमान अध्यक्ष विश्वनाथ खनाल र विराटनगर ट्रान्सपोट एशोसिएशनका निवर्तमान अध्यक्ष विनोद कुमार सिंहको उम्मेदवारी परेको थियो ।

उक्त निर्वाचनमा जम्मा ६० मत खसेको र त्यसमध्ये ३२ मत प्राप्त गरि विश्वनाथ खनाल ४ मतको अन्तरले विजयी भएको निर्वाचन अधिकृत राजकुमार श्रेष्ठले जानकारी दिनुभयो ।

अध्यक्ष बाहेक अन्य सम्पूर्ण पदाधिकारीहरू सर्वसम्मत चयन भएको र अध्यक्ष पदको लागि मात्र निर्वाचन गर्नुपरेको प्रमुख निर्वाचन अधिकृत अधिवक्ता श्रेष्ठले जानकारी गराउनुभयो ।

विश्वनाथ खनालको नेतृत्वमा चयन भएको नयाँ कार्यसमितिको अन्य पदाधिकारीहरूमा अच्युतराज खनाल (बरिष्ठ उपाध्यक्ष), क्षेत्रगत उपाध्यक्षहरूमा क्रमशः ध्रुव दाहाल खत्री, केशव गिरी, खेम जंग बस्नेत र प्रदिप अर्याल, महासचिवमा अरुण कुमार श्रेष्ठ, सचिवमा पुष्पराज श्रेष्ठ र कोषाध्यक्षमा राजेन्द्र प्रसाद गुप्ता निर्वाचित हुनुभएको छ भने ५ जना केन्द्रीय सदस्यहरूमा कृष्ण राज पौडेल, सुशिल पौडेल, श्याम प्रसाई, धर्मराज पोख्रेल र टेकराज पोख्रेल निर्वाचित हुनुभएको हो ।
कालीगण्डकी खबरबाट