रोशनबहादुर सिंह

अमेरिका

अगष्ट ३०, २०२३ यो दिन नेपाली क्रिकेट समर्थकका लागि एक यादगार दिन हुनेछ । कारण नेपालले पहिलो पटक एशिया कपमा पाकिस्तानविरुद्ध उसकै मैदानमा प्रतिस्पर्धा गर्नेछ ।

कुटनितिक हिसाबले नेपाल र पाकिस्तानविचको सम्बन्ध सन् १९६० देखि चलिरहेको छ । तर कुटनितिक सम्बन्ध एकतिर भएपनि नेपाल र पाकिस्तान पहिलो पटक एक अर्काको विरोधीका रुपमा मैदानमा उत्रदैछन । त्यो पनि पाकिस्तानको मुल्तान शहरको क्रिकेट मैदानमा ।

बुधबारको दिन विश्वभर छरिएर रहेका तथा तीन करोड नेपालीका लागि एउटा गर्वको क्षण हुनेछ ।

एकदिवसिय क्रिकेटमा नम्बर एक टिम पाकिस्तान र १५ औं स्थानमा रहेको नेपालविचको खेलका लागि नेपाली समर्थक धेरै नै उत्सुक रहेका छन ।

काठमाडौंबाट १३ सय ७४ किलोमिटर टाढा रहेको मुल्ताको क्रिकेट मैदानमा नेपाली खेलाडी उत्रदा सबैको मनमा एउटै चाहना हुन्छ, यो खेल जितिदिए हुन्थ्यो भनेर । तर विश्व क्रिकेटको बरियतामा शिर्ष १० मा पर्ने बलर र ब्याटसम्यानको संयोजन रहेको पाकिस्तानसँग खेल्न पाउनु नै नेपालका लागि गर्वको कुरा हो ।

नेपालले अहिलेसम्म टेष्ट टिमविरुद्ध यसअघि बंगलादेशसँग २०१४ को टी २० विश्वकपमा खेलेको थियो । त्यसपछि टेष्ट देशको सिनियर टिमसँग खेल्न लागेको यो पहिलो पटक हो ।

विश्व क्रिकेटका पावरहाउस टिम भारत र पाकिस्तानसँग एकै प्रतियोगितामा खेल्न लागिरहेको नेपालका बारेमा यतिबेला क्रिकेट क्षेत्रमा ठूलो चर्चा छ ।

सोसियल मिडियाका भित्ताहरुमा अहिले क्रिकेटमय बनेको छ भने सबै नेपाली सञ्चारमाध्यमको मुख्य हेडलाइन नै यहि बनेको छ । ३० हजार दर्शक क्षमता रहेको मुल्तान क्रिकेट मैदानमा २५ हजार टिकटहरु विक्रिभइरकेको पाकिस्तानी मिडियाले जनाएका छन । आफ्नो टिम पहिलो पटक पाकिस्तानसँग खेलेको प्रत्यक्ष हेर्नका लागि मैदानमा नै पुगेर हेर्ने नेपलाी पनि देखिएका छन ।

पाकिस्तानमा नै रहेर शिक्षा लिइरहेका नेपालीमात्र होइन, नेपालबाट नै क्रिकेटका लागि भनेर जानेको संख्यापनि निकै छ । यहि प्रतियोगिताका लागि भनेर विभिन्न ट्राभल एजेन्सीहरुले सस्तो र सुलभ प्याकेजपनि ल्याएका छन । जसका कारणपनि नेपालबाट यो खेल हेर्न जानेको संख्या बढेको देखिएको छ ।

दक्षिण एशियाली देशका लागि मिनी विश्वकप जस्तै रहेको एशिया कपको पहिलो खेलमा नै नेपालसँग खेल्न लागेको पाकिस्तानले एक दिन अगाडी नै आफ्नो सुरुवाती ११ सार्वजनिक गरिसकेको छ । जसमा उसले आफ्नो पुरै क्षमताका साथ टिमको घोषणा गरेको छ ।

खेलको अघिल्लो दिन भएको पत्रकार सम्मेलनमा पाकिस्तान क्रिकेट टिमका कप्तान बाबर आजामले नेपाललाई सजिलो रुपमा नलिने बताए । उनले भारतसँग खेल्न अगाडी नेपाल आफ्नो बलियो प्रतिस्पर्धी रहेको बताए । पेपरमा नेपाल पाकिस्तान भन्दा निकै तलको टिम हो । तर पनि उपाधिमा आँखा लगाइरहेको पाकिस्तान आफुभन्दा कमजोर टिम भएपनि बलियो टिमका रुपमा लिइरहेको छ ।

यतिबेला बिभिन्न सञ्चारमाध्यममा नेपाली क्रिकेटका बारेमा पाकिस्तान कतिको जानकार छ भन्ने शिर्षकमा निकै समाचार आइरहेका छन । क्रिकेटमा नेपाल र पाकिस्तान सिनियर स्तरमा पहिलो पटक खेल्न लागेको भएपनि केहि महिना अगाडी भएको इमर्जिङ एशिया कपमा नेपालले पाकिस्तानको ए टिमसँग खेलेको थियो । भलै नजिता नराम्रो भएपनि ।

नेपाली टिमले पाकिस्तान र भारतविरुद्धको खेल आफ्ना लागि यादगार बनाउने योजना रहेको कप्तान रोहितकुमार पौडेलले बारम्बार भन्दै आएका छन । जुन बुधबार सार्थक पनि बनोस ।