नेपाल चट्याङको चौथो उच्च जोखिम भएको मुलुकमा रहेको छ । सोही जोखिमलाई आधार मानेर चट्याङले पु-याउने धनजनको क्षति न्यूनीकरण तथा त्यसबाट बच्ने उपाय छलफल गर्न नेपालले चट्याङसम्बन्धी अन्तर्राष्ट्रिय सम्मेलन थालेको छ ।

प्रि–मनसुनका बेलादेखि बढी क्रियाशील हुने चट्याङले मात्रै बर्सेनि झन्डै सय जनाको ज्यान लिन्छ । र, यो बाढी–पहिरोले भन्दा पनि धेरैको ज्यान लिने प्राकृतिक विपद् बनिरहेको छ । नेपालमा चट्याङ्सम्बन्धी सूचना प्रणालीहरू छैनन् भने रोकथामका लागि खास काम पनि हुनसकेको छैन । यही परिप्रेक्षमा नेपालमा चट्याङसम्बन्धी अन्तर्राष्ट्रिय सम्मेलनको आयोजना गरिएको हो । ११ मुलुकका विज्ञहरूको सहभागिता रहेको चट्याङसम्बन्धी सम्मेलनमा ४७ जनाले आफ्नो शोधपत्र प्रस्तुत गर्दै छन्, जसमा २८ वटा शोधपत्र नेपालबाट प्रस्तुत हुनेछ ।

सम्मेलनमा अमेरिका, भारत फ्रान्सलगायतका मुलुकका विज्ञहरूको सहभागिता रहेको छ । सम्मेलनले विश्वमा चट्याङको अवस्था, रोकथामका लागि गरिएका प्रयास र नीति निर्माताले सम्बोधन गर्नुपर्ने विषयमा छलफल भइरहेको चट्याङविद् प्राडा श्रीराम शर्माले बताए ।