विद्युतीय चुरोटको स्वरुपमा भएको सुन तस्करी प्रकरणमा नेकपा माओवादी केन्द्रका उपाध्यक्ष कृष्णबहादुर महराका छोरा राहुलसहित तीन जनालाई मुद्दा चलाउन सिफारिस गरेको छ ।

सीआईबीले आइतबार राहुल, दाबा छिरिङ र सुन काण्डमा मुछिएका दाउजिङवाङका सवारी चालक लोकेन्द्र पौडेलसहित तीन जनालाई मुद्दा चलाउने रायसहित सरकारी वकिलको कार्यालयलाई अनुसन्धान प्रतिवेदन बुझाएको हो । 

उनीहरुबाट ८ करोड ५५ लाख बिगो मागदाबीसहित संगठित अपराध र भन्सार चोरीमा मुद्दा चलाउन सीआईबीले सिफारिस गरेको छ । 

चिनियाँहरुसँग सम्पर्कमा देखिएका माओवादी उपाध्यक्ष महरालाई भने मुद्दा चलाउनु नपर्ने सीआइबीको निष्कर्ष छ ।

भदौ १३ गते पक्राउ परेका राहुलविरुद्ध दुबईबाट ल्याएको सुन तस्करीमा संलग्न रहेको आरोप लागेको छ । चिनियाँ नागरिक दाउजिङवाङसहितका कारोबारीसँग निरन्तर सम्पर्कमा रहेका महराको सुन तस्करीमा संलग्नता रहेको सीआईबीले निष्कर्ष निकालेको हो ।

गत पुसमा विद्युतीय चुरोटबाट आएको सुन विमानस्थलबाट चोरी भएको थियो । भेपमा सुन ल्याउने चिनियाँ नागरिक ली भने फरार छन् त्यस्तै हङकङबाट आएको ६१ किलो सुन तस्करी प्रकरणमा संलग्न रहेको आरोप लागेका दाबा छिरिङलाई ९ किलोमा पनि मुद्दाका लागि सिफारिस गरेको छ ।