अमेरिकामा पहिलोपटक सांगीतिक टुरका लागि नेपालबाट आएका गायक हर्कुलस बस्नेत न्युयोर्कमा भएको सांगीतिक कार्यक्रममा उपस्थित नभएपछि धेरै सङ्का उपसङ्का गर्न थालिएको छ । गत अक्टोबर ३१ तारिखमा बोस्टनमा भएको कार्यक्रम सकेर न्युयोर्क पुगेका गायक बस्नेत सो कार्यक्रममा सहभागि नभएपछि कहाँ गए भन्ने प्रश्न खडा भएको छ । 

गायिका अस्मिता अधिकारीसँगै अमेरिका टुरमा आएका गायक बस्नेत कसैको सम्पर्कमा नआएपछि उनी कता गए भन्ने प्रश्न खडा भएको छ । इन्दिरा जोशी, कालिप्रसाद बास्कोटा र अस्मिता अधिकारीसँगै हर्कुलस बस्नेतले बोस्टनमा सँगै कार्यक्रम गरेका थिए । त्यसपछि इन्दिरा र कालिप्रसाद कार्यक्रमका लागि डालास उडेका थिए भने बस्नेत र अधिकारी न्यूयोर्क आएका थिए । 

तर नोभेम्बर एक तारिखमा न्युयोर्कको क्विन्समा भएको कार्यक्रममा बस्नेत सहभागि मात्र भएनन्, उनी आयोजकको सम्पर्कमा नै आएनन् । जसका कारण उनी कता हराए भन्ने प्रश्न उब्जिएको हो । न्यूयोर्कपछि उनको क्यालिफोर्नियामा समेत सांगीतिक कार्यक्रम रहेकोले अझै उनि सम्पर्कमा आएका छैनन ।

आयोजकका एक सदस्यले उनलाई बारम्बार सम्पर्क गर्दा जबाफ नफर्काएको र सामाजिक संजाल मार्फत सन्देश पटक पटक गर्दा म्यासेज हेर्ने तर उत्तर नदिएको बताए । जसका बस्नेत कार्यक्रममा नआएपछि अस्मिता अधिकारी एक्लैले न्युयोर्कको कार्यक्रममा प्रस्तुती दिएकी थिइन । 

लाइभ एट प्रिजेन्टको मुख्य आयोजनामा अमेरिका टुरमा आएका बस्नेत अक्टोबर २१ मा अमेरिका पुगेका थिए । न्युयोर्कमा साथी भेट्न जान्छु भनेर हिडेका बस्नेत त्यसपछि सम्पर्कमा नआएपछि स्थानीय आयोजकलाई चिन्ता थपिएको छ भने कतै केहि भयो की भन्ने शङ्का पनि बढेको छ । 

अमेरिका टुर अन्तर्गत हर्कुलस र बस्नेतले बाल्टिमोर र भर्जिनियामा पनि कार्यक्रम गर्ने योजना छ । बस्नेत सम्पर्कबिहिन हुँदा अबका कार्यक्रममा अन्योलता छाएको छ । बस्नेत नोभेम्बर २५ मा भर्जिनियामा अन्तिम सांगितिक कार्यक्रम गरेपछि नेपाल जाने कार्यक्रम थियो ।