काठमाडौँ —चिनियाँ विदेशमन्त्री वाङको निमन्त्रणमा गएकी परराष्ट्रमन्त्री राणाले वाङलाई नेपाल भ्रमणको पनि निम्तो दिएकी छन् ।

सो वार्ताका क्रममा प्रधानमन्त्री ओलीको आसन्न चीन भ्रमणका क्रममा समझदारी एवं सम्झौता हुने विभिन्न आयोजना एवं सहयोग आदानप्रदानबारे पनि आवश्यक छलफल भएको थियो ।

परराष्ट्रमन्त्री आरजु राणा देउवा र चिनियाँ विदेशमन्त्री वाङ यीबीच शुक्रबार चीनको छेन्दु सहरमा द्विपक्षीय भेटवार्ता भएको छ । उनीहरुबीच नेपाल-चीन सम्बन्धका विविध पक्ष, आपसी हित र साझा चासोका साथै प्रधानमन्त्री ओलीको आसन्न चीन भ्रमण र त्यस अवसरमा हुने दुई देशबीचको सहयोग आदानप्रदानका विषयमा कुराकानी भएको परराष्ट्र मन्त्रालयले जनाएको छ ।

चिनियाँ विदेशमन्त्री वाङको निमन्त्रणामा गएकी परराष्ट्रमन्त्री राणाले वाङलाई नेपाल भ्रमणको पनि निम्तो दिएकी छन् । वार्ताका क्रममा चीनको ७५ औं स्थापना दिवस र आगामी वर्ष नेपाल-चीन कूटनीतिक सम्बन्ध स्थापनाको ७०औं वार्षिकोत्सवका अवसरमा विदेशमन्त्री वाङमार्फत चीन सरकार र चिनियाँ नागरिकलाई मन्त्री राणाले बधाई दिइन् ।

मन्त्री राणाले पछिल्लो समय नेपाल-चीन सम्बन्धमा उल्लेखनीय उपलब्धिहरू हासिल भएका र यसका कारण सम्बन्ध थप बलियो बन्दै गएको उल्लेख गरिन् । उनले चीन सरकारले चीन भ्रमण गर्ने नेपाली नागरिकहरूलाई हालै भिसा शुल्क नलाग्ने घोषणा गरेकोमा चीन सरकारलाई धन्यवाद दिइन् ।