काठमाडौँ —काठमाडौं जिल्ला अदालतले स्वर्णलक्ष्मी सहकारी ठगीमा सोमबारको थुनछेक बहसपछि गोर्खा मिडिया नेटवर्कका तत्कालीन प्रबन्ध निर्देशक रवि लामिछानेलाई हिरासतमै राख्न आदेश दिएको छ ।

जाहेरवालाका तर्फबाट सुरु भएको थुनछेकको बहस नसकिएपछि न्यायाधीश माधवप्रसाद अधिकारीले लामिछानेलाई हिरासतमै राख्ने आइतबारको आदेशलाई निरन्तरता दिएका हुन् । 

सरकारका तर्फबाट जिल्ला न्यायाधिवक्ता खडिन्द्रराज कटुवालले बहस थालेका थिए । स्वर्णलक्ष्मी सहकारीको बचत अपचलन लामिछानेले गरेको बलियो प्रमाण रहेकाले उनलाई पुर्पक्षका लागि थुनामै पठाउनुपर्ने उनको जिकिर थियो ।

लामिछानेले स्वर्णलक्ष्मीमा खाता खोलेरै ऋण लिएको र त्यसको प्रमाण सर्भरमा रहेको सफ्टवेयरमा समेत भेटिएकाले उनी दोषी देखिएको कटुवालको तर्क थियो ।

लामिछानेले भने आफू सुरुको दिन अदालतमै हाजिर हुन आएकाले हिरासत मुक्त हुन पाउनुपर्ने माग गरेका थिए । जवाफमा न्यायाधीश अधिकारीले आइतबारकै आदेशले निरन्तरता पाउने भन्दै मंगलबार माघे संक्रान्तिको सार्वजनिक बिदा परेकाले अर्को सुनुवाइ बुधबार हुने निर्णय सुनाए ।

सोमबार लामिछानेविरुद्ध ९ सरकारी वकिल र जाहेरवाला पक्षका दुई वकिलले बहस गरेका थिए । पीडितकै तर्फबाट बहस नसकिएकाले लामिछाने पक्षका वकिलको पालो आउन सकेन ।