अन्तर्राष्ट्रिय नेपाली साहित्य समाज (अनेसास) बोर्ड अफ ट्रस्टीज (बिओटी) को २०१८–२०२२ को नयाँ कार्यसमितिको निर्वाचन हिजो सम्पन्न भएको छ । प्राप्त परिणाम अनुसार अध्यक्षमा गीता खत्री, उपाध्यक्षमा पदम विश्वकर्मा र पुरु सुवेदी, सचिवमा शिव लामिछाने, कोषाध्यक्षमा राम लामा 'अविनासी', पुरस्कार समिति अध्यक्षमा डा गोपी उप्रेती तथा सदस्यमा तीर्थराज अधिकारी निर्वाचित हुनुभएको छ । हरेक चार वर्षका लागि हुने कार्यसमितिको निर्वाचनमा दुई जना उपाध्यक्ष पदका लागि मात्र निर्वाचन भएको थियो भने अध्यक्षलगायतका बाँकी पदका लागि उम्मेदवारहरुको चयन निर्विरोध भएको थियो । उपाध्यक्ष पदमा पदम विश्वकर्माले ४० मत तथा पुरु सुवेदीले ३२ मत प्राप्त गर्नुभयो । तेस्रा प्रत्यासी वलराम थापाले २३ मत प्राप्त गर्नुभयो । अनेसास बोर्ड अफ ट्रस्टीमा सदस्यहरु कूल ६१ जना रहेकामा निर्वाचनमा ५७ मत खसेको थियो । निर्वाचन यही डिसेम्बर १५ देखि १८ सम्म इमेलका माध्यमबाट भएको थियो । नेपाली भाषासाहित्यलाई प्रवासका नेपालीका नयाँ पुस्तामा जीवन्त राख्ने उद्देश्यले सन् १९९१ मा होमनाथ सुवेदीको संस्थापक अध्यक्षतामा संयुक्त राज्य अमेरिकाको वासिङ्टन डी सी मा अन्तर्राष्ट्रिय नेपाली साहित्य समाजको स्थापना भएको हो । हाल अनेसासका विभिन्न ३० भन्दा बढी देशमा करीब ८० शाखाहरु क्रियाशील छन् । यस कार्यसमितिले अमेरिकामा अनेसासको केन्द्रीय कार्यालय भवन आगामी दुई वर्षभित्रमा खरिद गर्ने र अनेसासले हरेक दुई वर्षमा वितरण गर्ने अनेसास सर्वोत्कृष्ट पुस्तक पुरस्कारको छनौट प्रक्रिया र पुरस्कारको स्तरलाई अझ व्यवस्थित र पारदर्शी बनाउने मुख्य उद्देश्य राखेको नवनिर्वाचित अध्यक्ष गीता खत्रीले बताउनुभयो । अनेसासले विभिन्न च्याप्टरहरुमा नेपाली बालबालिकाका लागि नेपाली भाषा पाठशाला सञ्चालनमा ल्याएको छ भने यसको विस्तार गर्ने उद्देश्यसहित नेपाली पाठ्यक्रम समेत तयार गरिसकेको छ । अनेसासको विधानअनुसार बिओटीले अनेसास केन्द्रीय समितिलाई आवश्यक परामर्श दिनुका साथै केन्द्रका गतिविधिलाई अनुगमनकारी भूमिका निर्वाह गर्ने गर्दछ । अनेसासको विधानअनुसार एक हजार अमेरिकी डलर चुक्ता गरेपछि नेपाली भाषासाहित्यलाई प्रेम गर्ने व्यक्तिले बिओटीको सदस्य बन्न सक्ने व्यवस्था रहेको छ ।