मुक्तक -१
कुनै तृष्णा र प्यासको कुरा नगर
कृत्रिम खुशी र मिठासको कुरा नगर
संघर्षको अर्को नाम हो जिन्दगी
दया, स्नेह र उपहासका कुरा नगर ।
- शारदा घिमिरे भैल
बनेपा न. पा .- ५ काभ्रे
मुक्तक -२
कर्कलाको पातको पानी हो जिन्दगी
निभेको चिताको खरानी हो जिन्दगी
उत्खनन गर्न सके हिरा पनि भेटिएला
नसके त विकारको खानी हो जिन्दगी ।
- सबु धिमाल धुलीखेल, काभ्रे ।
मुक्तक -३
कहीँ खडेरीमा छ त कहीँ सिमसारमा जिन्दगी
कही बिरहमा छ त कही मिठो प्यारमा जिन्दगी
समयको गतिसँगै हुइकिनु पर्छ यहाँ सबैलाई
कहीं पतझडमा छ त कहीँ बहारमा जिन्दगी ।
- मोहन खड्का " प्यासी" महालक्ष्मी नगरपालिका -४ चानुवा नम्फु धनकुटा ।
हाल : किर्तीपुर नयाँ बजार ।
मुक्तक -४
आगो रोष र क्रोध हो हृदयको आगै न हो जिन्दगी
आगो भोक र तृप्ति हो प्रणयको आगै न हो जिन्दगी
औधी कोमल यै कठोर पनि यै सौभाग्य दुर्भाग्य यै
आगो सृष्टि र ध्वंस हो समयको आगै न हो जिन्दगी ।
- अमर त्यागी
गजल गुँड कलैया, बारा
हाल : बेटोनडोर्फ, आइवा, अमेरिका ।
मुक्तक - ५
स्वीकार्नुपर्छ परिस्थिति, एक घटक रहेछ जिन्दगी
सयौं जुनी चाहे नि पाइने, एक पटक रहेछ जिन्दगी
थाहै नपाई बितिहाल्छ, बिबशताले जितीहाल्छ
जन्म अनि मृत्यु बीचको, एक चटक रहेछ जिन्दगी ।
- गोम बिक्रम
कल्लाबारी, पाल्पा ।
२०७६ असार ५
(यी मुक्तकहरु नेप्लिज डायस्पोराका साहित्य पेजका सम्पादक गोम बिक्रमले संकलन गर्नु भएको हो। - सम्पादक।)
