मुक्तक - १ बदलिदैन झट्ट बिश्वास, देशकै सत्ता धानेकासँग भरोसा लाग्छ उसैगरी, हृदयले आफ्नै ठानेकासँग मस्त छौं हामी अन्धभक्त, चुसिँदा आफ्नै जीउको रक्त कसले बाजी मार्न सक्नु ?, छक्का-पञ्जा जानेकासँग । मुक्तक -२ कर्मशीलका मुहारभरी, मुजै- मुजा भएको छ समृद्ध देश देख्ने चाह, धुजै-धुजा भएको छ इमान्दारको बद्ख्वाइँ गरी, भ्रष्टहरूले रजाइँ गरी देश बिरूद्ध लाग्नेको नै, पुजै-पुजा भएको छ । मुक्तक -३ निर्वाह मात्रै भन्दिन म, गुजारा चलोस् जिन्दगी उज्यालो छरी सारातिर, दियो झैं बलोस् जिन्दगी उत्सवमय बन्नुपर्छ, दुनियाँले नि गन्नुपर्छ संघर्षमै फुलोस बरू, संघर्षमै फलोस् जिन्दगी । मुक्तक -४ नहुनेलाई सताइकन, मनमा राँको झोसेका छन् समस्यालाई चर्काइरहन,अगुल्टो उत्ति ठोसेका छन् स्वार्थ केन्द्रमा राखेपछि, माथिको स्वाद चाखेपछि सानाको भाग खोस्छन् अनि, ठूल्ठूलालाई पोसेका छन् । मुक्तक -५ गर्दै नगर्नेको भजन र, नारा सिद्धान्त घोक्नुपर्याछ अपराधी वा वापती हुन्, पहुँच छ र बोक्नुपर्याछ थुकेको थुक चाटिएन, आफूले कहिले ढाँटिएन अगाडी, माथी चम्चे पुग्दा, आफूले सलाम ठोक्नु पर्याछ । ✍ गोम बिक्रम कल्लाबारी, पाल्पा । २०७६ चैत्र २९   https://youtu.be/-nOYsZW0UEg