अमेरिकाको नाभाडास्थित ब्ल्याक रक डेजर्टमा हरेक बर्ष हुँदै आएको ‘बर्निङ म्यान’ फेस्टिबलमा गएका करिव ७० हजार मानिसको खराब मौसमका कारण बिचल्लि भएको छ । जसका कारण आयोजकलाई यो कार्यक्रम सम्पन्न गर्नका लागि ठूलो चुनौती भएको छ ।

मरुभूमीको बिचमा गरिएको यो कार्यक्रमका लागि अमेरिकाबाट ८० हजार मानिस पुगेका थिए । जसमा अस्थाई बसोबसका लागि टेन्टहरु गाडिएको थियो भने त्यहि अनुसारको अरु ब्यवस्थापनि गरिएको थियो । तर शुक्रबार रातीबाट अचानक आएको हावाहुरी र बर्षाका कारण त्यहाँ पुगेका मानिसहरु बिचल्लिमा परेका छन । यतिमात्र होइन, मानिसको मृत्युपनि भएको र पुलिसले अनुसन्धान गरिरहेको बताइएको छ ।

अरु समयमा तातो बालुवाले गर्मी हुने यो स्थानमा लगातार बर्षा भएपछि चिसो हुनुका साथै मानिसलाई हिड्नका लागि पनि कठिन भएको छ । मानिसहरु आफुलाई सुरक्षित स्थानमा पुर्याउनका लागि पनि कुनै उपाय नहुँदा हाहाकार मच्चिएको छ । दुई दिनसम्म लगातार बर्षा हुँदा बालुवा हिलोमा परिणत भएको छ भने मानिसको खुट्टा भास्सिने र जतात्यतै पानी भरिएको छ ।

मानिसहरु हिड्नका लागि फोहोर फाल्ने प्लास्टिक ब्याग जुत्तामा बेरेर बाहिर निस्किने प्रयास गरेपनि संख्या धेरै भएपनि कठिन भएको छ । आयोजकले सबैलाई आफुलाई सुरक्षित राख्नका लागि सचेत गरेका थिए ।

अचानक मौसममा आएको खराबीका कारण यो बर्षको फेस्टिबलमा ठूलो असर परेको छ । तिब्रगतिको हावा, बर्षाले बाढी नै आएको छ । यो ठाँउमा हुने फेस्टिबलमा सहभागि हुनका लागि हरेक बर्ष हजारौं मानिसहरु जाने गरेका छन । बिशेष गरेर सेप्टेम्बरको पहिलो साता लामो बिदा पर्ने भएकाले पनि मानिसहरु रमाउनका लागि जाने गरेका छन । शुक्रबारबाट सुरु भएको बर्षा आइतबारसम्म रहने भएपछि मानिसहरुलाई खानका लागि पनि आवश्यक सामाग्री उपलब्ध गराउन कठिन भएको छ ।

पुरै हिलो भएपछि गाडीहरुपनि यो ठाँउमा प्रवेश गराउन र बाहिर जानदिन रोक लगाएको छ । आयोजकहरु त्यहाँ फसेका मानिसहरुलाई मेडिकलका सामान, मोबाइल सेवा उपलब्ध गराउनका लागि लागि परेपनि कठिन भइरहेको सीएनएनले जनाएको छ । त्यहाँ पुगेका केहि मानिसहरु जसोतसो हिडेरै रोडसम्म पुगेर आयोजकले उपलब्ध गराएको बसबाट निस्कन सफल भएका थिए । तर पनि ठूलो संख्यामा रहेका मानिस टेन्टमा नै फसेको बताइएको छ ।

यो ठाँउबाट मुख्य सडक हिडेर जाँदा ६ माईल टाढा रहेको छ । तीन दिनको फेस्बिलका लागि पुगेका मानिसहरुले अत्याबश्यक बाहेक अरु सामानहरु नबोकेको र अहिलेको कठिन अवस्थामा त्यो कुराहरु पर्याप्त नहुँदा निकै कठिन भएको बताइएको छ ।

आइतबार हावा र पानीको बेग कम भएर मौसममा परिवर्तन आउने भएकाले आयोजकहरु अझै यो कार्यक्रमलाई सम्पन्न गर्ने बताइरहेका छन ।

photo-CNN/UStoday