मादकपदार्थ सेवन गरेर गाडी चलाउनु भनेर ज्यानलाई जोखिममा पार्नु हो । त्यसमा पनि रक्सिले टुन भएर हाईवेमा त्यो पनि बिपरित दिशातिर चलाउनु भनेको काललाई नै निम्त्याउनु हो । तर अमेरिकाको नेब्रास्कामा एउटा यस्तो घटना भएको छ, जो मादकपदार्थ सेवन गरेर हाइवेमा गलत साइडमा गाडी चलाएर उल्टै अर्को गाडी चलाउने ब्यक्ति गलत छ भन्दै ९११ मा फोन गरेका छन । जसको परिणाम उनी मादकपदार्थ सेवन गरेर गाडी चलाउने केसमा भित्र परेका छन ।

यो घटना केहि साता अगाडीको हो । एक जना गाडी चालक आफैले खनेको खाडलमा आफै परेका छन । नाम नखोलिएका ती ब्यक्तिले रातिको समयमा ९११ मा फोन गरेर अर्को ब्यक्ति गलत बाटोमा गइरहेको र आफु हाईवे ७७ मा रहेको भनेर फोन गरेका थिए । लान्कास्टर काउन्टी पुलिसले फेसबुकमा सार्वजनिक गरेको भिडियो र अडियोमा ती ब्यक्तिले आफु हाईवे ७७ मा उत्तरतर्फ गइरहेको र अर्को ब्यक्ति रोडको गलत साइडबाट आएर आफुलाई झण्डै हानेको भनेर पुलिसलाई फोन गरेका थिए । साथै उनले आफु यो ठाँउमा रोकिएको भनेर जानकारी दिएका थिए ।

उनको त्यो फोनपछि पुलिस उनी भएको स्थानमा आएका थिए । तर त्यहाँ पुग्दा अवस्था ठिक उल्टो थियो । फोन गर्ने ब्यक्ति नै सडकको उल्टो बाटोमा थिए । दक्षिणतिर जाने बाटोमा उनी उत्तर तिर गुडेका थिए ।

पुलिसले उनलाई रोकेपछि सोधेका थिए, तपाईलाई थाहा छ हामीले किन रोकेको ? त्यो बेलासम्म उनले आफुले गलत गरेको भनेर बुझिसकेका थिए । जसका कारण उनले सहजै आफु गलत दिशामा गुडिरहेकाले भनेर स्विकारे । तर बचाउका लागि आफुले हाइवेबाट निस्किने एक्जिट मिस गरेको हुनसक्ने भन्दै पुलिसलाई बताएका थिए । उनी आफैले नै केहि बेर अगाडी ९११ मा फोन गर्ने म नै रहेको भन्दै जानकारी दिए ।

उनी मादकपदार्थले झुम थिए । त्यहाँको कानुनले पिउनका लागि जति लिमिट तोकेको छ, त्यो भन्दा दोब्बर नै उनले सेवन गरेका थिए । त्यसपछि उनको गाडीले पुलिसले कब्जामा लिएको थियो भने उनलाई पनि पक्राउ गरेको थियो । यदि समयमा नै पुलिस नपुगेको भए, ठूलो दुर्घटना हुने निश्चित भएको बताएका छन ।