अमेरिकी राष्ट्रपति जो बाइडेनका छोरा हन्टर बाइडेन पाँच बर्ष अघि बन्दुक खरिद गर्दा झुटो बिबरण पेश गरेको भन्दै अहिले मुद्दा लागेको छ । अमेरिकी सञ्चारमाध्यम सीएनएनका अनुसार उनीमाथि ३ वटा बिषयमा अभियोग लाग्न सक्ने बताएको छ । सन् २०१८ मा उनले बन्दुक खरिद गर्दा संघीय हतियार आवेदन पत्रमा भर्नुपर्ने बिबरण झुटो रहेको प्रमाणित भएपछि उनीमाथि अभियोग लागेको हो ।

अमेरिकी इतिहासमा न्याय बिभागले कार्यकाल सम्हालिरहेका राष्ट्रपतिको छोराविरुद्ध मुद्दा दायर गरेको यो पहिलो पटक हो । हन्टर वाईडेनले यसअघि यो बिषयलाई सार्वजनिक रुपमा नआई समाधान गर्न लागेका थिए । तर त्यो हुन सकेन ।

हन्टर बाइडेनको अनुसन्धान डेभिड वेसले गरिरहेका छन । यी तिनै अधिवक्ता हुन, जसलाई पूर्व राष्ट्रपति डोनाल्ड ट्रम्पले नियुक्त गरेका थिए । हन्टरले डेलावेयर स्थित एक बन्दुक पसलमा हतियार खरिद गर्दा भर्नुपर्ने फारममा गलत बिबरण भरेका थिए । त्यसमा उनी कुनैपनि गैरकानूनी लागुपदार्थ प्रयोग नगर्ने गरेको र यस्तो कुराको लत नभएको भनेर उल्लेख गरेका थिए । तर त्यो बेला उनी लागु पदार्थको लतसँग संघर्ष गरिरहेको बताइएको छ ।

यदि उनलाई लागेको आरोप प्रमाणित भएको खण्डमा जरिवानामात्र होइन, जेल सजायपनि हुने बताइएको छ । उनीमाथि तीन वटा आरोप लागेको छ, यदि तीन वटै प्रमाणित भएको खण्डमा २५ बर्षको जेल सजाय र सात लाख ५० हजार डलर सम्मको जरिवाना हुनसक्नेछ ।

उनको यो मुद्दाले जो वाइडेनको विपक्षीलाई ठूलो हतियार बनेको छ । यो सातामात्र जो वाइडेनका दुई ठूला कमजोरी एक्पोज भएको सीएनएनले उल्लेख गरेको छ ।

तस्विर:एपी