बाल्टिमोर एसोसियसन अफ नेप्लिज इन अमेरिका बाना को आयोजनामा हुन लागेको नेपाली सडक महोत्सवको तयारी अन्तिम चरणमा पुगेको छ । छैटौं संस्करणका रुपमा रहेको यो कार्यक्रमलाई यसअघिका बर्ष भन्दा यो पटक अझ उत्कृष्ट बनाउने योजनाका साथ बानाले तयारी जोडतोडका साथ गरेको छ ।
बानाका अध्यक्ष सुबोध पन्तका अनुसार यो संस्करणमा पहिलो पटक बाल्टिमोरमा रहेका सबै समाज र संस्थाले एकसाथ कार्यक्रम गर्ने भनेर एकबद्धता जनाएको बताए । साथै यो पटक एनआरएनए अमेरिकाले पनि यो कार्यक्रमका लागि सहयोग गरेको बताए ।
पन्तले नेपाली संस्कृती झल्किने नाचगानका साथै झाक्री कार्यक्रम हुने र विभिन्न भेष भुषामा विभिन्न समाजका कलाकारले प्रस्तुती दिने बताए । यस्तै कार्यक्रममा खेलकुदका साथै बाल्टिमोरमा रहेका विभिन्न संस्थाबाट आफ्नो मौलिक प्रस्तुती समावेश गर्ने बताए ।
कार्यक्रमलाई नेपाली दुतावासले पनि सहयोग गरेको छ । पन्तका अनुसार कार्यक्रममा १६ वटा स्टलहरु राखिने र त्यसमा नेपाली विभिन्न खानेकुराहरु राखिनेछ । यसका साथै ह्याण्डिक्र्राफ्टका सामानहरु पनि प्रदर्शनीमा राखिनेछ । यसका साथै नेपाली मौलिक कपडाहरुपनि प्रदर्शनीमा राखिनेछ । यस्तै बाल्टिमोरमा नेपालीले उत्पादन गरेका तरकारीहरुको पनि स्टल राखिनेछ ।
यो कार्यक्रमलाई बाल्टिमोर काउन्टीको पनि सहयोग रहेको छ । कार्यक्रममा बाल्टिमोर काउन्टिका सहायक जोनीले पनि आफ्नो धारणा राख्नेछन ।
आइतबार बिहान ११ बजेबाट सुरु हुने कार्यक्रम साँझ ६ बजे सकिनेछ । हरेक बर्ष हुँदै आएको कार्यक्रमलाई सफल पार्नका लागि बानाले अध्यक्ष पन्तको संयोजकत्वमा एक सय एक जनाको आयोजक समिती बनाएको छ । यसका साथै कार्यक्रममा सहभागि हुने प्रतिबद्धता जनाएका सबै संस्थाले पनि स्वयंमसेवकका रुपमा सहयोग गर्ने बताएको पन्तले जानकारी दिए ।
इनास मेरिल्याण्ड र इनास अमेरिकाको समेत प्रस्तुती रहने कार्यक्रमका लागि खर्चको ब्यवस्थापनपनि बाना गरिसकेको बताएको छ ।
मेरिल्याण्डमा रहेका नेपालीहरुको सहयोगका लागि स्थापना भएको बानाले सडक महोत्सव कार्यक्रम सन् २०१५ देखि सुरु गरेको थियो । तर बिचमा एक बर्ष कोभिडका कारण हुन सकेको थिएन । त्यसबाहेक अरु बर्ष निरन्तर रुपमा भइरहेको छ । अघिल्लो बर्ष यो कार्यक्रम सफल रुपमा भएपनि बर्षाका कारण सोचे अनुसार हुन नसकेको अध्यक्ष पन्तले बताए ।
