जाजरकोटमा गएको भुकम्पमा परेर ज्यान गुमाउने नेपालीको सम्झनामा अमेरिकाको बाल्टिमोरस्थित हिन्दु बुद्ध मन्दिरमा दीप प्रज्वलन तथा सामुहिक प्रार्थना गरिने भएको छ ।
घरदेश दुख्दा परदेश रुन्छ भन्ने मनोभावनाका साथ भुकम्प गएको १३ औं दिन पुगेको दिन बाल्टिमोरमा रहेका नेपाली एकजुट भएर यो कार्यक्रम गरिन लागेको हो ।
म्याग्दी समाज अमेरिकाको आयोजनामा हुने कार्यक्रम नोभेम्बर १६ तारिख बिहिबारका दिन गरिनेछ । साँझ ५ बजेबाट सुरु हुने कार्यक्रममा बाल्टिमोरमा रहेका नेपालीलाई उपस्थित हुन म्याग्दी समाजले अपिल गरेको छ ।
जाजरकोट केन्द्रबिन्दु बनाएर गएको भुकम्पमा परेर एक सय ५३ जनाले ज्यान गुमाएका थिए । जसमा ८३ जना बालबालिका रहेका थिए । जसमा जाजरकोटमा ५५ जनाले ज्यान गुमाएका थिए भने रुकुम पश्चिममा २८ जनाको मृत्यु भएको थियो ।
नलगाडमा १७ महिला, १० पुरुष, १५ बालक र ९ बालिका गरी ५१ जनाको ज्यान गएको छ । त्यस्तै, भेरी नगरपालिकामा ४२ जनाको मृत्यु भएको छ । जसमा १४ महिला, चार पुरुष र बालबालिका २४ रहेका छन् ।
